ଓଲିଉଡର ଲୋକପ୍ରିୟ ହାସ୍ୟ ଅଭିନେତା ପପୁ ପମପମ୍ କୌଣସି ନା କୌଣସି କାରଣରୁ ସବୁବେଳେ ଚର୍ଚ୍ଚାରେ ରହିଥାନ୍ତି । ଅଭିନୟ ସହ ଅନେକ ସମୟରେ ସେ ବିବାଦରେ ଛନ୍ଦି ହୋଇ ରହିଥାନ୍ତି । ୨୦୧୬ ମସିହାରେ ପପୁଙ୍କୁ ନେଇ ଏକ ସାଂଘାତିକ ସଭିଯୋଗ ସାମ୍ନାକୁ ଆସିଲା । ଅଭିନୟରେ ସୁଯୋଗ ଦେବେ କହି କିଛି ଯୁବତୀ ଓ ନାବାଳିକା ତାଙ୍କ ଦ୍ଵାରା କାଷ୍ଟିଂ କାଉଚର ଶିକାର ହୋଇଥିବା କଥା ସାମ୍ନାକୁ ଆସିଥିଲା । ଏହି ମାମଲାରେ ସାମାଜିକ ଭାବେ ପପୁଙ୍କୁ ଯେତିକି ଅପଦସ୍ତ ହେବାକୁ ପଡିଥିଲା ଆଇନଗତ ଭାବେ ମଧ୍ୟ ଦଣ୍ଡ ଭୋଗିବାକୁ ପଡିଥିଲା ।
ପପୁ ପମପମ୍ ଙ୍କ ଏହି ମାମଲା ଦୀର୍ଘ ଦିନ ଧରି କୋର୍ଟରେ ବିଚାରାଧୀନ ରହିଥିଲା । ତେବେ ଗତକାଲି ପପୁଙ୍କୁ ମାନ୍ୟବର ହାଇକୋର୍ଟ କାଷ୍ଟିଂ କାଉଚ ମାମଲାରେ ନିର୍ଦ୍ଦୋଷରେ ଖଲାସ କରିଛନ୍ତି । ଏନେଇ ପପୁ କହିଛନ୍ତି କି, ସେ ଝିଅଟି ତାଙ୍କ ଘରପାଖର । ସେ ସେତେବେଳେ ଦଶମ ଶ୍ରେଣୀରେ ପଢୁଥିଲା । ପପୁଙ୍କ ସହ ଦେଖା ହେଲେ ସେ କଥା ହୁଏ ସେଲଫି ମଧ୍ୟ ନିଏ । ଏପରିକି ଫିଲ୍ମରେ ଆକ୍ଟିଙ୍ଗ କରିବାକୁ ଇଚ୍ଛା ବୋଲି ମଧ୍ୟ ପପୁଙ୍କୁ କୁହେ ।
ଦଶମ ଶ୍ରେଣୀରେ ଭଲ ରେଜଲ୍ଟ କଲେ ତାକୁ ଆକ୍ଟିଙ୍ଗ କରେଇବେ ବୋଲି ପପୁ ସବୁବେଳେ କହି ଦିଅନ୍ତି, ଯାହାକି ସେହି ଝିଅର ଘରଲୋକ ମଧ୍ୟ ଜାଣିଥିଲେ । ହେଲେ ଅନ୍ୟ ଦୁଇଜଣ ଝିଅଙ୍କ ସହ ସେହି ଝିଅ ମଧ୍ୟ ମୁହଁରେ କଳା କପଡା ବାନ୍ଧିକି ମିଡିଆ ସାମ୍ନାରେ ତାଙ୍କ ନାଁରେ ମିଛ କଥା କହିଥିଲା । ତାକୁ କେହି ବୋଧେ ଏମିତି କରିବା ପାଇଁ ଶିଖେଇ ଥିବ ବୋଲି କହିଛନ୍ତି ପପୁ ।
ପପୁଙ୍କ ପାଖକୁ ଜଜମେଣ୍ଟ ପେପରଟି ଏବେ ଯାଏଁ ଆସିନି । ତେଣୁ ଜଜମେଣ୍ଟ ପେପର ଆସିବା ପରେ ପୁରା ମାମଲା କଣ ସେ ଜାଣିପାରିବେ ଓ ମିଡିଆକୁ ଜଣେଇ ପାରିବେ ବୋଲି କହିଛନ୍ତି । ପପୁ ଆହୁରି କହିଛନ୍ତି କି, ସେ କିଛି ଭୁଲ କରି ନଥିଲେ ତେଣୁ ନିର୍ଦ୍ଦୋଷ ମଧ୍ୟ ସାବ୍ୟସ୍ତ ହେଲେ । ଜଜମେଣ୍ଟ ପଢିବା ପରେ ସେ କଣ ପଦକ୍ଷେପ ନେବେ ସେନେଇ ଚିନ୍ତା କରିବେ । ତାଙ୍କ ନାଁରେ ଅନେକ ମନଇଚ୍ଛା ଗପିଛନ୍ତି ଓ ବିଭ୍ରାଟ ସୃଷ୍ଟି କରିଛନ୍ତି ।
ମିଛ ମାମଲାରେ ତାଙ୍କୁ ଖୁବ ଅପଦସ୍ତ ହେବାକୁ ପଡିଛି, ଯାହାକି ତାଙ୍କର ଉଭୟ ବ୍ୟକ୍ତିଗତ ଓ ବୃତ୍ତିଗତ ଜୀବନ ଉପରେ ପ୍ରଭାବ ପକାଇଛି । ତେଣୁ ନିଶ୍ଚୟ ଏକ ମାନହାନି ମାମଲା ପପୁ ରୁଜୁ କରିବେ ବୋଲି ସ୍ପଷ୍ଟ କହିଛନ୍ତି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।