ଚଳିତ ଆଇପିଏଲରେ ହାଇଦ୍ରାବାଦ ବିପକ୍ଷ ମ୍ଯାଚରେ ଦମଦାର ଶତକକୁ ନେଇ ଚର୍ଚ୍ଚାରେ ରହିଛନ୍ତି ବିରାଟ କୋହଲି । ଆଇପିଏଲରେ ତାଙ୍କ ବ୍ୟାଟିଂ ଦକ୍ଷତାକୁ ନେଇ ପ୍ରଶ୍ନ ଉଠାଉଥିବା ଲୋକଙ୍କ ମୁହଁ ଚୁପ୍ କରିଛନ୍ତି କୋହଲି । ଖାଲି ସେତିକି ନୁହେଁ ବରଂ ଚଳିତ ଆଇପିଏଲରେ 500 ରୁ ଅଧିକ ସ୍କୋର କରି କମାଲ ଦେଖାଇଛନ୍ତି କିଙ୍ଗ କୋହଲି । ହାଇଦ୍ରାବାଦ ବିପକ୍ଷରେ ମ୍ଯାଚ ଜିତିବା ପରେ RCB ର ପ୍ଲେ-ଅଫ୍ ଖେଳିବା ଆଶା ଉଜ୍ଜୀବିତ ରହିଛି ।
ବାଙ୍ଗାଲୋର ଏବେ ସୁଦ୍ଧା 13ଟି ମ୍ଯାଚରୁ 14 ପଏଣ୍ଟ ହାସଲ କରି ପ୍ଲେ-ଅଫ୍ ଦୌଡରେ ସାମିଲ ରହିଛି । ବାଙ୍ଗାଲୋର ଟ୍ରଫି ଉଠାଉ ବୋଲି ଫ୍ୟାନ୍ସ ମାନେ ମଧ୍ୟ ଆଶା ବାନ୍ଧିଛନ୍ତି । ଆଜି ଗୁଜୁରାଟ ବିପକ୍ଷ ମ୍ଯାଚ ଜିତି ପ୍ଲେ-ଅଫରେ ସ୍ଥାନ ପକ୍କା କରିବାକୁ ବାଙ୍ଗାଲୋର ମଇଦାନକୁ ଓହ୍ଳାଇବ । ଏହାରି ଭିତରେ ହାଇଦ୍ରାବାଦ ବିପକ୍ଷ ମ୍ଯାଚରେ ବିଜୟ ହିରୋ ସାଜିଥିବା କୋହଲିଙ୍କୁ ନେଇ ଏକ ଅଜଣା କଥା ସାମ୍ନାକୁ ଆସିଛି । ଯାହା କୋହଲି ନିଜେ ଖୁଲାସା କରିଛନ୍ତି ।
ପୂର୍ବତନ ଭାରତୀୟ କ୍ରିକେଟର ରବିନ ଉଥପ୍ପାଙ୍କ ସହ ଆଲୋଚନା ବେଳେ କୋହଲି କହିଛନ୍ତି, ଯେତେବେଳେ ମୁଁ ବ୍ରେକରୁ ମଇଦାନକୁ ଫେରିଥିଲି ସେତେବେଳେ ମୁଁ ଭାବିଥିଲି ଏହା ମୋର ପ୍ରତିଯୋଗୀତା ମୂଳକ କ୍ରିକେଟ କ୍ଯାରିୟରର ଶେଷ ମାସ ହୋଇପାରେ । ଏଭଳି ଭାବନା ମୋତେ ଠିକ ଲାଗୁଥିଲା । କାରଣ ଭଗବାନ ମୋତେ ଯେତିକି ଦେଇଥିଲେ ସେଥିରେ ମୁଁ ଖୁସି ଥିଲି । ମୁଁ ଜମା ବି ହତାଶ ନଥିଲି । କିନ୍ତୁ ଏସିଆ କପ୍ ରେ ପ୍ରଦର୍ଶନ ପୁଣି ଥରେ ମୋତେ କମବ୍ୟାକ୍ ସୁଯୋଗ ଦେଲା ।
କାରଣ ଆଫଗାନିସ୍ତାନ ବିପକ୍ଷରେ ଆନ୍ତର୍ଜାତୀୟ ଟି-20 କ୍ଯାରିୟରରେ ମୁଁ ପ୍ରଥମସତକ ଲଗାଇବାରେ ସଫଳ ହୋଇଥିଲି । ସେତେବେଳେ ରାହୁଲ ଦ୍ରାବିଡଙ୍କ ନିଷ୍ପତ୍ତିରେ ହଁ ମାରିବା ମୋ କ୍ରିକେଟ କ୍ଯାରିୟରକୁ ନୂଆ ମୋଡ ଦେଇଥିଲା । ମ୍ଯାଚର ଗୋଟିଏ ଦିନ ପୂର୍ବରୁ ଆଫଗାନିସ୍ତାନ ବିପକ୍ଷରେ ଓପନିଂ କରିବାକୁ କହିଥିଲେ ରାହୁଲ । ଆଉ ତାଙ୍କ ନିଷ୍ପତ୍ତିରେ ମୁଁ ହଁ ମାରିଥିଲି । ଓପନିଂ କରିବା ସହ ଆରମ୍ଭରୁ ହିଁ ଆକ୍ରମଣାତ୍ମକ ବ୍ୟାଟିଂ କରିଥିଲି, ଆଉ ସେହିଠାରୁ ହିଁ ମୋ ପାଇଁ ସବୁକିଛି ପୂର୍ବବତ୍ତ ହୋଇଗଲା ।
ସେହିଠାରୁ ମୋତେ ପୁଣି ଥରେ ଭଲ ପ୍ରଦର୍ଶନ କରିବାକୁ ଉତ୍ସାହ ମିଳିଥିଲା । ଏହା ଏଥିପାଇଁ ସମ୍ଭବ ହେଲା କାରଣ ମୋର ନିଜ ଉପରେ ଭରସା ଥିଲା । ଫ୍ୟାନ୍ସ ଯାହା ଚାହୁଁଛନ୍ତି ତାହା ପୁଣି ଥରେ ମୁଁ କରିବାକୁ ଚାହିଁଥିଲି । ଶେଷରେ କଠିନ ପରିଶ୍ରମର ଫଳ ମିଳିଲା । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।