ସମାଜସେବା କରିବା ପାଇଁ ପୁଳାଏ ଟଙ୍କାର ଆବଶ୍ୟକତା ହୋଇ ନଥାଏ କି ସ୍ଥାନର । ଏହାକୁ ପ୍ରମାଣିତ କରି ଦେଖାଇଛନ୍ତି ଓଡିଆ ପୁଅ ପ୍ରମୋଦ । ଆମେ ଗୋଟିଏ ସ୍ଥାନରୁ ଅନ୍ୟ ସ୍ଥାନକୁ ଯିବା ପାଇଁ ରେଳଯାତ୍ରା କରିଥାଉ । କିନ୍ତୁ ପ୍ରମୋଦ ରେଳଯାତ୍ରାର ସମୟକୁ ମଧ୍ୟ ସମାଜସେବାରେ ଲଗାଇ ଦିଅନ୍ତି । ହାତରେ ଏକ କୁମ୍ପି ଧରି ବଗିରୁ ବଗି ବୁଲି ଆର୍ଥିକ ସାହାଯ୍ୟ ମାଗନ୍ତି ପ୍ରମୋଦ । କର୍କଟ ସମ୍ପର୍କରେ ଲୋକଙ୍କୁ ସଚେତନ କରିବା ସହ କର୍କଟ ପୀଡିତଙ୍କ ପାଇଁ ଏଭଳି ଆର୍ଥିକ ସହାୟତା ମାଗନ୍ତି ପ୍ରମୋଦ ।
ସେ ହେଉଛନ୍ତି ସଙ୍ଗୀତ ସହ ବଞ୍ଚୁଥିବା ଜଣେ ମଣିଷ । ବଂଶୀ ସୁରରେ ସଙ୍ଗୀତ ପ୍ରେମୀଙ୍କୁ ଆକୃଷ୍ଟ କରିବାର କଳା ତାଙ୍କୁ ଭଲଭାବେ ଜଣା । ଏଥିପାଇଁ ଅନେକ ମଞ୍ଚ ସହ ଟିଭି ପରଦାରେ ମଧ୍ୟ ସେ ପ୍ରଶଂସା ସାଉଁଟିଛନ୍ତି । ସଙ୍ଗୀତ ସାଧନାରେ ସମୟ ବିତାଉଥିଲେ ବି ସମାଜସେବାକୁ ନିଜ ବ୍ରତ ଭାବି ନେଇଛନ୍ତି ପ୍ରମୋଦ ।
ସେ ଭାରତୀୟ ଶାସ୍ତ୍ରୀୟ ସଙ୍ଗୀତ ଏବଂ ଭାରତୀୟ ସଂସ୍କୃତି ଉପରେ ରାଜସ୍ଥାନ ବିଶ୍ଵ ବିଦ୍ୟାଳୟରେ ଡକ୍ଟରେଟ କରୁଛନ୍ତି । ପାଠପଢା ସାଙ୍ଗକୁ ସମାଜସେବାରେ ବି ସେ ନିଜକୁ ହଜାଇ ଦେଇଛନ୍ତି । ସମାଜସେବା ପାଇଁ କୁମ୍ପି ଧରି ସେ ବିଶ୍ଵ ବିଦ୍ୟାଳୟ ଯାଉଛନ୍ତି ଏବଂ କର୍କଟ ପୀଡିତଙ୍କ ପାଇଁ ଆର୍ଥିକ ସାହାଯ୍ୟ ଯୋଗାଡ କରୁଛନ୍ତି । ସେ ଯେଉଁଠାକୁ ମଧ୍ୟ ଯାତ୍ରା କଲେ ସାଥିରେ ନେଇ ଯାଉଛନ୍ତି କୁମ୍ପି ।
ତେବେ କୁମ୍ପିକୁ ସାଥିରେ ନେଇ ଯିବାବେଳେ ଅନେକ ଟାହି-ଟାପରାର ମଧ୍ୟ ସମୁଖୀନ ହେଉଛନ୍ତି ପ୍ରମୋଦ । କିନ୍ତୁ କେବେ ମଧ୍ୟ ହାର ନମାନି ସମାଜସେବା କରି ଚାଲିଛନ୍ତି । ସେ ରାଜସ୍ଥାନରେ ପଢିବା ସମୟରେ ବିଶ୍ଵ ବିଦ୍ୟାଳୟରେ କୁମ୍ପି ଧରି ସାହାଯ୍ୟ ମାଗୁଥିଲେ । ସେଠାରେ ବହୁଭାଷୀ ପିଲା ପଢନ୍ତି । ସେମାନଙ୍କୁ ସେ ନିଜର ଉଦ୍ଦେଶ୍ୟ ବିଷୟରେ ବୁଝାଇବା ପରେ ଅନେକ ପିଲା ଆଗ୍ରହୀ ହୋଇ କୁମ୍ପିରେ କିଛି ନା କିଛି ସାହାଯ୍ୟ ରାଶି ପକାଉଥିଲେ ।
ଏହା ଦେଖିବା ପରେ ପ୍ରମୋଦ ଭାବିଥିଲେ କି ସେ ଭୁବନେଶ୍ଵର ଆସିବା ବାଟରେ ଯଦି ଟ୍ରେନରେ ଏହି କୁମ୍ପି ଧରି ଆସିବେ ତେବେ ନିଶ୍ଚୟ ଭାବେ କର୍କଟ ପୀଡିତଙ୍କ ପାଇଁ କିଛି ଅଧିକ ପରିମାଣରେ ଅର୍ଥ ଯୋଗାଡ କରିପାରିବେ । ତେଣୁ ସେ ଟ୍ରେନରେ ମଧ୍ୟ ସାହାଯ୍ୟ ମାଗିବାରୁ ପଛାଇ ନଥିଲେ । ଆମେ ପ୍ରତ୍ଯେକ ଦିନ ଅନେକ ବଦଖର୍ଚ୍ଚ କରିଥାଉ ।
ସେହି ଟଙ୍କାକୁ ଯଦି କିଛି ଏଭଳି ସଂଗ୍ରହ କରି ରଖିବା ତେବେ ତାହା ସମାଜର କଲ୍ୟାଣ ନିମନ୍ତେ ବ୍ୟବହୃତ ହୋଇପାରିବ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।