୪୮ ଘଣ୍ଟା ବିତିଯିବା ପରେ ବି ମାଆ ଆନାକୋଣ୍ଡା ଛୁଆ ଜନ୍ମ କରି ପାରୁ ନଥିଲା । ଏମିତି ସମୟ ବିତିବା ପରେ ଆନାକୋଣ୍ଡା ପେଟରେ ଛୁଆ ଜୀବିତ ଅଛନ୍ତି କି ନାହିଁ ଜାଣିବା ବହୁତ ଜରୁରୀ ହୋଇ ଯାଇଥିଲା । କାରଣ ଅନେକ ସମୟ ଧରି ଛୁଆ ମା ପେଟରୁ ବାହାରକୁ ଆସି ନ ପାରିଲେ ସେମାନେ ମରିଯିବାର ସମ୍ଭାବନା ଅଧିକ ରହିଥାଏ । ଏଭଳି ଏକ ଦୃଶ୍ୟ ଦେଖିବାକୁ ମିଳିଥିଲା ନନ୍ଦନକାନନରେ । ଯାହା ଫଳରେ ଚିନ୍ତାରେ ପଡି ଯାଇଥିଲେ ନନ୍ଦନକାନ କତ୍ତୃପକ୍ଷ ଓ ଅଧିକାରୀମାନେ ।
ଶେଷରେ ନନ୍ଦନକାନନର ଡେପୁଟି ଡାଇରେକ୍ଟର ବାଧ୍ୟ ହୋଇ ଡାକ୍ତର ଇନ୍ଦ୍ରମଣୀ ନାଥ, ଓୟୁଟି ଙ୍କୁ ଯୋଗାଯୋଗ କରିଥିଲେ । ଦିନ ପ୍ରାୟ ସାଢେ ୧୨ଟା ବେଳକୁ ଡାକ୍ତରଙ୍କୁ କଲ୍ କରା ଯାଇଥିଲା । ସେ ଶୁଣିବାକୁ ପାଇଥିଲେ କି ନନ୍ଦନକାନନରେ ଥିବା ଏକ ଆନାକୋଣ୍ଡା ସାପ ଗର୍ଭବତୀ ଥିଲା । ଆଉ ସେ ଗୋଟିଏ ଛୁଆ ଜନ୍ମ କରିଛି । ସେହି ଗୋଟିଏ ଛୁଆ ଜନ୍ମ କରିବାର ୪୮ ଘଣ୍ଟା ବିତିଗଲାଣି । ଗର୍ଭିଣୀ ଆନାକୋଣ୍ଡାର ପେଟ ଭିତରେ ଆଉ ଛୁଆ ଗୁଡା ଅଛନ୍ତି କିନ୍ତୁ ଜନ୍ମ ହୋଇ ପାରୁନାହାନ୍ତି ।
ଏତେ ସମୟ ଧରି ପେଟରେ ଛୁଆ ରହିଲେ ଉଭୟ ମା’ ଓ ଛୁଆଙ୍କ ଜୀବନ ପ୍ରତି ବିପଦ ରହିଥାଏ । ତେଣୁ ଡାକ୍ତର ନାଥ ତାଙ୍କ ପଶୁ ଚିକିତ୍ସା ଓ ପଶୁପାଳନ ମହାବିଦ୍ୟାଳୟର ଜଣେ ଗାଇନାକୁଲୋଜି ପ୍ରଫେସରଙ୍କ ସହ ଯାଇ ନନ୍ଦନକାନନରେ ପହଞ୍ଚିଲେ । ପୂର୍ବରୁ ଏକ୍ସ-ରେ ସାପ ପେଟରେ ଛୁଆ ରହିଥିବା ଜଣା ପଡୁଥିଲା ।
ସେମାନେ ପହଞ୍ଚିବା ପରେ ଛୁଆ ଗୁଡିକ ଜୀବିତ ଅଛନ୍ତି ନା ନାହିଁ ଜାଣିବା ପାଇଁ ସାପକୁ ଅଲଟ୍ରାସାଉଣ୍ଡ କରିଥିଲେ । ଯାହାପରେ ଛୁଆମାନଙ୍କ ହୃଦ ସ୍ପନ୍ଦନ ଚାଲୁଥିବା ଜଣା ପଡିଥିଲା । ସାପର ଗର୍ଭାଶୟର ବାଟଟି ବନ୍ଦ ହୋଇ ଯାଇଥିଲା ବୋଲି ସେ ଜନ୍ମ କରି ପାରୁ ନଥିବା ଜଣାପଡିବା ପରେ ସେମାନେ ଆନାକୋଣ୍ଡାକୁ ଅକ୍ସିଟକ୍ସିନ ଇଂଜେକସନ ଦେଇଥିଲେ ।
ଯାହାପରେ ସାଙ୍ଗେ ସାଙ୍ଗେ ସେ ଆଉ ଏକ ଛୁଆ ଜନ୍ମ କରିଥିଲା । ଛୁଆଟି ଅଧିକ ସମୟ ମା’ ପେଟରେ ରହିଥିବାରୁ ନିସ୍ତେଜ ହୋଇ ଯାଇଥିଲା । ତେଣୁ ତାକୁ କିଛି ପ୍ରାଥମିକ ଚିକିତ୍ସା କରାଯିବା ପରେ ସେ ଭଲ ହୋଇଥିଲା । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।