ନିଜ ରାଜ୍ୟର ଲୋକଙ୍କ ବିକାଶ ପ୍ରତି ଧ୍ୟାନ ଦେବା ବଦଳରେ ଓଡିଶାର ସୀମାନ୍ତ ଗାଁ ଗୁଡକୁ ନିଜ ଅକ୍ତିଆରରେ ନେବାକୁ କୁଚକ୍ରାନ୍ତ କରି ଆସୁଛି ଆନ୍ଧ୍ରପ୍ରଦେଶ । ହେଲେ ଏବେ ନିଜର ଷଡଯନ୍ତ୍ର ନିଜ ଉପରେ ତାକୁ ଭାରି ପଡିଲାଣି । କାରଣ ଓଡିଶାର ବିକାଶଧାରାକୁ ଦେଖି ଏବେ ଓଡିଶା ସହ ମିଶିବେ ବୋଲି ସୀମାନ୍ତ ଲୋକେ କହୁଛନ୍ତି । ଚିତ୍ରକୋଣ୍ଡା ଠାରେ ବିଏସଏଫ ଏବଂ ପୋଲିସର ମିଳିତ ସହଯୋଗରେ ହେଉଥିବା ଏକ ଜନସମ୍ପର୍କ ଶିବିରରେ ଆନ୍ଧ୍ରପ୍ରଦେଶର 6ଟି ଗାଁର ଲୋକମାନେ ଆସି ମାଲକାନଗିରି ଏସପିଙ୍କୁ ଭେଟି ଏନେଇ ନିବେଦନ କରିଛନ୍ତି ।
ସେମାନେ ଏନେଇ କହିଛନ୍ତି କି, ଆମ ସରକାର ଆମକୁ ପଚାରୁ ନାହାନ୍ତି । ଆପଣ ଆମକୁ ବିକାଶ ଦେଲେ ଆମେ ଓଡିଶାରେ ମିଶିଯିବୁ । ସେମାନଙ୍କ ଗାଁକୁ ରାସ୍ତାଘାଟ ନାହିଁ କି ବ୍ରିଜ ନାହିଁ । ସ୍କୁଲ ଅଛି ହେଲେ ଶିକ୍ଷକ ନାହାନ୍ତି । ପାନୀୟଜଳ ପାଇଁ ସୀମାନ୍ତ ଲୋକଙ୍କୁ ବହୁତ ହଇରାଣ ହେବାକୁ ପଡୁଛି । ସେଥିପାଇଁ ସେମାନେ ଓଡିଶା ସହ ମିଶିବାକୁ ଚାହୁଁଥିବା କହିଛନ୍ତି । ମାଲକାନଗିରି ଏସପି ନୀତେଶ ୱାଧୱାନି ନିଜେ ମଧ୍ୟ ଏନେଇ ଗଣମାଧ୍ୟମରେ ପ୍ରକାଶ କରିଛନ୍ତି ।
ଲାଲ ବାହିନୀର ଆତଙ୍କ ଯୋଗୁଁ ବିଚ୍ଛିନ୍ନାଞ୍ଚଳରେ ବିକାଶ ଅଟକି ଯାଇଥିଲା । ଯେଉଁଥି ପାଇଁ ସମସ୍ତ ପ୍ରକାରର ମୌଲିକ ସୁବିଧାର ଏଠାକାର ବାସିନ୍ଦା ବଞ୍ଚିତ ହେଉଥିଲେ । କେନ୍ଦ୍ର ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ସେହି ଅଞ୍ଚଳରେ ଆଣ୍ଟି ନକ୍ସଲ ଅପରେସନ ଆରମ୍ଭ ହୋଇଥିଲା । ବିଏସଏଫ ମାଲକାନଗିରିକୁ ଆସିବା ପରେ ଲାଲ ବାହିନୀ ପଛଘୁଞ୍ଚା ଦେଇଥିଲେ । ତା’ପରେ ସେଠାରେ ବିକାଶ ଧାରା ଆଗେଇ ଚାଲିଲା ।
ସେଠାକାର ପ୍ରାୟ ସମସ୍ତ ଗାଁକୁ ଏବେ ରାସ୍ତା ଫିଟି ସାରିଥିବା ବେଳେ ପାନୀୟଜଳ, କୃଷି ପାଇଁ ଜଳସେଚନ ସୁବିଧା, ଶିକ୍ଷା ଓ ସ୍ୱାସ୍ଥ୍ୟ ଉପରେ ଗୁରୁତ୍ଵ ଦେଉଛନ୍ତି ସରକାର । ଏହି ବିକାଶ ଦେଖି ଓଡିଶାରେ ମିଶିବାକୁ ଆକୃଷ୍ଟ ହେଉଛନ୍ତି ସୀମାନ୍ତ ଆନ୍ଧ୍ରପ୍ରଦେଶ ବିଶାଖାପାଟଣା ଜିଲ୍ଲାର ଅନେକ ଗାଁର ଲୋକମାନେ । କାରଣ ସେହି ଗାଁ ଗୁଡିକରେ ପକ୍କା ସଡକ କଥା ତ ଛାଡ ବିଶୁଦ୍ଧ ପାନୀୟଜଳ ବ୍ୟବସ୍ଥା ବି ନାହିଁ ।
ଆଜି ବି ଏଠାକାର ଲୋକ ସାଧାରଣ ମୌଳିକ ସୁବିଧାରୁ ବଞ୍ଚିତ ଅଛନ୍ତି । ଓଡିଶା ସୀମାନ୍ତ ଗାଁ ଗୁଡିକୁ ନିଜ ସହ ମିଶାଇବା ପାଇଁ ଚକ୍ରାନ୍ତ କରୁଥିବା ରାଜ୍ୟ ନିଜ ରାଜ୍ୟର ଗ୍ରାମବାସୀଙ୍କୁ ମୌଳିକ ସୁବିଧା ଯୋଗାଇ ପାରୁନି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।