ଗତକାଲି ବହୁଚର୍ଚ୍ଚିତ ଡାକ୍ତର ସୁମିତ କୁମାର ସାହୁ ଏବଂ ତପସ୍ଵିନୀ ଦାଶଙ୍କ ମାମଲାରେ ରାୟ ଶୁଣାଇଛନ୍ତି ଜିଲ୍ଲା ଦୌରା ଜଜ୍ । ପ୍ରାୟ ଦୁଇ ମାସ ଧରି ଲଢେଇ ଜାରି ରଖିବା ପରେ ତପସ୍ଵିନୀଙ୍କୁ ବର୍ତ୍ତମାନ ତାଙ୍କ ତପସ୍ୟାର ଫଳ ମିଳିଛି କହିଲେ ଅତ୍ଯୁକ୍ତି ହେବନାହିଁ । ପ୍ରଥମେ ୧୧ଦିନ ଧରି ତପସ୍ଵିନୀ ସୁମିତଙ୍କ ଘର ଆଗରେ ଧାରଣା ଦେଇଥିଲେ । ତା’ପରେ କୋର୍ଟ ଉଭୟଙ୍କୁ ଭଡାଘରେ ଏକାଠି ରହିବା ପାଇଁ କହିଥିଲେ । ଯାହାଫଳରେ ଉଭୟେ ଚିନିଶିଳ୍ପ ଗେଷ୍ଟହାଉସରେ ସାତଦିନ ରହିଥିଲେ ।
କିନ୍ତୁ କୋର୍ଟ ଏହି ଅବଧି ବଢାଇବା ପରେ ସୁମିତ ହଠାତ ଗାୟବ ହୋଇ ଯାଇଥିଲେ । ଫଳସ୍ଵରୂପ ତପସ୍ଵିନୀ ପୁଣି ଥରେ ତାଙ୍କ ଧାରଣାସ୍ଥଳକୁ ଫେରିଥିଲେ । ଆଉ ସେଠାରେ ଜନ ସାଧାରଣ ମିଶି ସୁମିତଙ୍କ ଘରର ଗେଟ୍ ଭାଙ୍ଗି ତପସ୍ଵିନୀଙ୍କୁ ପିଣ୍ଡାରେ ପ୍ରବେଶ କରାଇଥିଲେ । ଆଉ ସେବେଠାରୁ ଗତକାଲିର ଶୁଣାଣି ପାଇଁ ସମସ୍ତେ ପ୍ରତୀକ୍ଷା କରି ରହିଥିଲେ । ଆଉ ଏବେ ସେହି ପ୍ରତୀକ୍ଷାର ଶେଷ ହୋଇଛି ।
ନିଜ ଜିଦ୍ ରେ ଅଟଳ ଥିବା ତପସ୍ଵିନୀଙ୍କୁ ଏବେ ତାଙ୍କ ଶ୍ଵଶୁର ଘରେ ରହିବା ପାଇଁ କୋର୍ଟ ଅର୍ଡର ଦେଇଛନ୍ତି । ଆଉ କୋର୍ଟଙ୍କ ଏହି ରାୟକୁ ସୁମିତଙ୍କ ପରିବାର ମାନ୍ୟ କରୁଥିବାର ମଧ୍ୟ ଦେଖିବାକୁ ମିଳିଛି । କୋର୍ଟଙ୍କ ଏହିଭଳି ରାୟ ପରେ ସୁରକ୍ଷା ଅଫିସର ସୁମିତଙ୍କ ଘରେ ତପସ୍ଵିନୀଙ୍କ ରହିବା ସ୍ଥାନ ସମୀକ୍ଷା କରିବାକୁ ଯାଇଥିଲେ । ଆଉ ଉପର ମହଲାର ଏକ ରୁମ୍ ସେମାନେ ତପସ୍ଵିନୀଙ୍କୁ ଦେବା ପାଇଁ ବ୍ୟବସ୍ଥା କରିଥିବା ଜଣାପଡିଛି ।
ତପସ୍ଵିନୀଙ୍କୁ ଏନେଇ ପଚରା ଯିବାରୁ ସେ କହିଛନ୍ତି କି, ସେ କେବଳ ତାଙ୍କ ସ୍ଵାମୀଙ୍କ ରୁମ୍ ରେ ରହିବେ । ତଳେ ଶୋଇବେ ପଛେ ସ୍ଵାମୀଙ୍କ ରୁମ୍ ରେ ହିଁ ରହିବେ । ହେଲେ ସୁମିତଙ୍କ ବାପା କହିଛନ୍ତି କି, କୋର୍ଟ ସେମିତି କିଛି ନିର୍ଦ୍ଧିଷ୍ଟ ଅର୍ଡର ଦେଇ ନାହାନ୍ତି କି ତପସ୍ଵିନୀ ସୁମିତଙ୍କ ବେଡରୁମରେ ରହିବେ ବୋଲି ।
କୋର୍ଟଙ୍କ ରାୟକୁ ସମ୍ମାନ ଦେଇ ସେମାନେ ତାଙ୍କ ଘରେ ତପସ୍ଵିନୀଙ୍କ ରହିବା ପାଇଁ ବ୍ୟବସ୍ଥା କରିବେ । କିନ୍ତୁ ପରେ ସେମାନେ ଏହି ମାମଲାରେ ଉଚ୍ଚ ନ୍ୟାୟାଳୟକୁ ନିଶ୍ଚୟ ଯିବେ । ତେବେ ସୁମିତଙ୍କ ସ୍ୱାସ୍ଥ୍ୟ ମଧ୍ୟ ଏଯାଏଁ ଠିକ ନଥିବା ଏବଂ ସେ ବିଶ୍ରାମରେ ଥିବା କଥା କହିଛନ୍ତି ସୁମିତଙ୍କ ବାପା । ତେବେ ଦେଖାଯାଉ ତପସ୍ଵିନୀ ସ୍ଵାମୀ ସୁମିତଙ୍କ ଠାରୁ ଅଲଗା ଉପର ରୁମ୍ ରେ ରହିବାକୁ ରାଜି ହେବେ କି ନାହିଁ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍କୁ ଲାଇକ କରନ୍ତୁ ।