ଲୋକଙ୍କ ସୁରକ୍ଷାକୁ ଆଖି ଆଗରେ ରଖି ୫୦ କିମିରୁ ଅଧିକ ବେଗରେ ପବନ ହେଲେ ବିଜୁଳି କଟାଯିବ ବୋଲି ଶକ୍ତି ବିଭାଗ ତରଫରୁ ସୂଚନା

ଅନ୍ୟମାନଙ୍କୁ ପଢିବାର ସୁଯୋଗ ଦିଅନ୍ତୁ

ବାତ୍ୟା ପ୍ରବଣ ଅଞ୍ଚଳ ପାଇଁ ବିଦ୍ୟୁତ୍ କଟକଣା ଜାରି କରିଛି ଶକ୍ତି ବିଭାଗ । ଭୟଙ୍କର ବାତ୍ୟା ‘ଫୋନି’ ଯେତିକି ପାଖଉଛି, ଲୋକମାନଙ୍କ ମନରେ ସେତିକି ଛନକା ପଶୁଛି । ପବନର ବେଗ ୫୦ କିଲୋମିଟର ଛୁଇଁଲେ ପାଓ୍ବାର କଟ୍ ହେବ ବୋଲି ଶକ୍ତି ସଚିବ ହେମନ୍ତ ଶର୍ମା କହିଛନ୍ତି । ବାତ୍ୟା ପବନ କମିବା ପରେ ସବୁ ଅଞ୍ଚଳରେ ଯାଞ୍ଚ କରାଯାଇ ଆବଶ୍ୟକ ସ୍ଥାନରେ ମରାମତି କରାଯିବ ଏବଂ ଏହା ପରେ ବିଦ୍ୟୁତ ସଂଯୋଗ ଦିଆଯିବ । ‘ଫନି’ ଲ୍ୟାଣ୍ଡଫଲ୍ କରିବା ପୂର୍ବରୁ ଏବଂ ଲ୍ୟାଣ୍ଡଫଲ୍ କରିବା ସମୟରେ ପବନର ବେଗ ସର୍ବାଧିକ ୨୦୦କିଲୋମିଟର ରହିବ ବୋଲି ପାଣିପାଗ ବିଭାଗରୁ ସୂଚନା ମିଳିବ ।

 

ତେବେ ସୂଚନା ଅନୁଯାଇ ଆସନ୍ତାକାଲି ସକାଳ ୮ଟାରୁ ୧୦ଟା ମଧ୍ୟରେ ପୁରୀରେ ମାଡ ହେବ ବାତ୍ୟା ଫୋନି । ବର୍ତ୍ତମାନ ଏହି ସାମୁଦ୍ରିକ ଝଡ ପୁରୀ ଠାରୁ ମାତ୍ର ୩୨୦ କିଲୋମିଟର ଦୂରରେ ଅବସ୍ଥିତି ରହିଛି । ଏବେ ଏହାର ଗତି ୧୭ କିଲୋମିଟର ପ୍ରତି ଘଣ୍ଟା ବେଗରେ ସମୁଦ୍ର ପଥରେ ଗତି କରୁଥିବା ବେଳେ ଆସନ୍ତାକାଲି ସକାଳୁ ସକାଳୁ ପୁରୀ ନିକଟରେ ମାଡ ହେବାର ସମ୍ଭାବନା ରହିଛି । ତେବେ ବାତ୍ୟା ଲ୍ୟାଣ୍ଡଫଲ ସମୟରେ ପବନର ବେଗ ଘଂଟା ପ୍ରତି ୧୭୫ରୁ ୧୮୫ ହୋଇ ପାରେ ଏହି ସମୟରେ ବିଦ୍ୟୁତ ଖୁଣ୍ଟ ଉପୁଡିଯିବାର ଭୟ ରହିଛି ।

କେବଳ ସେତିକି ନୁହେଁ ଏହାସହ ଗଛ ଉପୁଡି ବିଦ୍ୟୁତ ତାର ଉପରେ ପଡିଯିବାର ଭୟ ମଧ୍ୟ ରହିଛି । ବିଶେଷକରି ପ୍ରଚଣ୍ଡ ପବନ ବେଳେ ବିଦ୍ୟୁତ୍ ଟ୍ରାନ୍ସଫର୍ମରଗୁଡିକ ସର୍ଟ ସର୍କିଟ୍ ହୋଇ ଜଳିଯିବାର ଆଶଙ୍କା ରହିଛି । ତେବେ ଏହିସବୁ ଦୁର୍ଘଟଣାକୁ ଏଡାଇବା ପାଇଁ ପବନର ବେଗ ଅଧିକ ହେବା ମାତ୍ରେ ବିଜୁଳି କାଟ୍ କରାଯିବ ବୋଲି ବିଭାଗ ପକ୍ଷରୁ କୁହାଯାଇଛି ।

 

ତେଣୁ ବାତ୍ୟା ପ୍ରଭାବିତ ଅଞ୍ଚଳର ଲୋକମାନେ ସେମାନଙ୍କ ମୋବାଇଲ, ଚାର୍ଜ ଲାଇଟ୍ ଆଦି ଚାର୍ଜ କରି ରଖିବା ସହ ପାଣି ମହଜୁଦ ରଖିବା ପାଇଁ ମଧ୍ୟ ପରାମର୍ଶ ଦିଆଯାଇଛି । ବିଶେଷକରି ପବନ ସମୟରେ ବିଜୁଳି କାଟ୍ ହୋଇଥିଲେ ମଧ୍ୟ ବିଜୁଳି ଯନ୍ତ୍ରାଂଶକୁ ନଛୁଇଁବା ପାଇଁ ଆଡଭାଇଜରୀ ଜାରି କରାଯାଇଛି ।


ଅନ୍ୟମାନଙ୍କୁ ପଢିବାର ସୁଯୋଗ ଦିଅନ୍ତୁ

Reply