ଛୋଟ ଛୋଟ ପିଲାମାନେ ହସୁଛନ୍ତି ଆଉ ସେପଟେ ଡିସିପି ମଧ୍ୟ ହସୁଛନ୍ତି । ଗୋଟିଏ ପଟେ ମାହୋଲ ଏକଦମ ଗମ୍ଭୀର ଆଉ ଅନ୍ୟପଟେ ଡିସିପି ଆଉ ପିଲାମାନଙ୍କ ମଧ୍ୟରେ ଚାଲିଛି ମଜାମସ୍ତି । ସାଙ୍ଗମାନଙ୍କ ମଧ୍ୟରେ ଯେମିତି ହୋଇଥାଏ ଏହି ଦୃଶ୍ୟ କିଛି ସେମିତି ଲାଗୁଛି । ରାଜଧାନୀରେ କମିଶନରେଟ ପୋଲିସ ତରଫରୁ ବେଆଇନ ନିଶାଦ୍ରବ୍ୟ ସେବନ ଓ ବିକ୍ରିକୁ ବନ୍ଦ କରିବା ଅଭିଯାନ ଜାରି ରହିଛି । ଏହି ସମୟରେ ସାଲିଆ ସାହିରୁ ବେଆଇନ ଭାବେ ଦେଶୀ ମଦ ତିଆରି ଚାଲିଥିବା ପୋଲିସ ଖବର ପାଇ ସେଠାରେ ଯାଇ ଚଢାଉ କରିଥିଲା ।
ସେପଟେ ଦେଶୀ ମଦ ଜବତ କାର୍ଯ୍ୟ ଚାଲିଥିବା ବେଳେ ଭୁବନେଶ୍ବର ଡିସିପି ପ୍ରତୀକ ସିଂ ଓ ସାଲିଆ ସାହିର ପିଲାମାନଙ୍କ ମଧ୍ୟରେ ଥଟ୍ଟା ମଜା ଚାଲିଥିବାର ଏକ ନିଆରା ଦୃଶ୍ୟ ଦେଖିବାକୁ ମିଳିଥିଲା । ଡିସିପିଙ୍କ ସହ ପିଲାମାନେ କଥା ହେବା ସହ ତାଙ୍କୁ ଚକୋଲେଟ ମଧ୍ୟ ଅଫର୍ କରିଥିଲେ । ଡିସିପି ପିଲାମାନଙ୍କ ମୁଣ୍ଡ ଆଉଁସି ଦେବା ସହ ମନଖୋଲି ସେମାନଙ୍କ କଥା ହେଉଥିଲେ । ପିଲାମାନେ ପାଠ ପଢୁଛ ନା ନାଇ ବୋଲି ମଧ୍ୟ ଡିସିପି ପଚାରିଥିଲେ ।
ପିଲାମାନେ ଡିସିପିଙ୍କ ସହ କଥା ହେଉଥିବା ବେଳେ ସେମାନଙ୍କ ମଧ୍ୟରୁ ଜଣେ ପିଲା ନିଜ ପାଟି ଓ ହାତ ସାହାଯ୍ୟରେ ବାଜା ବଜାଇ ତାଙ୍କୁ ଦେଖାଇଥିଲା । ଯାହାକୁ ବିଟ ବକ୍ସିଙ୍ଗ ବୋଲି କୁହାଯାଏ । ଏହି ସମୟରେ ଆଉ ଜଣେ ପିଲା ନିଜକୁ ନେଉଳ ବୋଲି କହିବା ସହ ମୁଁ ସାଲିଆ ଡନ୍ ବୋଲି କହିଥିଲା ।
ଡିସିପି ପିଲାଙ୍କ ସହ କଥା ହୋଇ ବେଶ ମଜା ଉଠାଉଥିବାର ଦେଖିବାକୁ ମିଳିଥିଲା । ଡିସିପିଙ୍କ ଏଭଳି ଅନ୍ଦାଜ ଦେଖି ବର୍ଦି ଭିତରେ ଜଣେ ସରଳିଆ ମଣିଷଟିଏ ଥିବା ଜଣାପଡୁଛି । ଜଣେ ଡିସିପି ହୋଇ ସାଧାରଣ ପିଲାଙ୍କ ସହ ତାଙ୍କର ଏଭଳି ବ୍ୟବହାର ସତରେ ବେଶ ପ୍ରଶଂସନୀୟ । ପୋଲିସ ପ୍ରତି ଲୋକଙ୍କ ମନରେ ଏକ ଅଜଣା ଭୟ ରହିଥାଏ ଡିସିପିଙ୍କ ଏଭଳି ବ୍ୟବହାର ଏହି ଭୟକୁ ଢାଙ୍କିବାରେ ସହାୟକ ହେବ ।
ସାଲିଆ ସାହିରୁ ଦେଶୀ ମଦ ଜବତ କରିବା ବେଳର ଏହି ନିଆରା ଦୃଶ୍ୟ ଅନେକଙ୍କ ମନକୁ ଛୁଇଁ ପାରିଛି । ଛୋଟ ଛୋଟ ପିଲାମାନେ ଡିସିପିଙ୍କ ସହ ମଜାଦାର ଭାବେ କଥା ହେବାର ଦୃଶ୍ୟ ଆପଣଙ୍କୁ କେମିତି ଲାଗିଲା ଆମକୁ କମେଣ୍ଟ କରି ଜଣାନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।