ଯେଉଁ ସବୁ ଜିନିଷକୁ ଅଦରକାରୀ ଭାବି ଆମେ ଘର ବାହାରେ ଫିଙ୍ଗି ଦେଉ, ଅସଲରେ ସେସବୁ ଦରକାରୀ ବୋଲି ଆପଣ କେବେ କଳ୍ପନା ମଧ୍ୟ କରି ନଥିବେ । ଏଣେତେଣେ ଫୋପଡା ଯାଉଥିବା କାଚ ବୋତଲ, ନଡିଆ ଖୋଳ ବା ଷଢେଇକୁ ନେଇ ତିଆରି ହେଉଛି ସୁନ୍ଦର କାରୁକାର୍ଯ୍ୟ । ଏହି କାରିଗର ଜଣଙ୍କ ଷଢେଇରୁ କପ୍, ପ୍ଳେଟ, ହଂସ, କଇଁଛ, ବୁଢିଆଣୀ, ଫୁଲଦାନି ଆଦି କେତେ କଣ ପ୍ରସ୍ତୁତ କରୁଛନ୍ତି । ଦୀର୍ଘ ବାର ବର୍ଷ ଧରି ଷଢେଇ, କାଚ ବୋତଲ ଓ ଅନ୍ୟ ଅଦରକାରୀ ବସ୍ତୁ ବ୍ୟବହାର କରି ଏହିପରି ମନଲୋଭା କାରୁକାର୍ଯ୍ୟ କରି ଆସୁଛନ୍ତି ଚିତ୍ତରଞ୍ଜନ ଭୋଇ ।
ସେ କଟକ କନ୍ଦରପୁରର ବାସିନ୍ଦା ଅଟନ୍ତି । ଆଉ ତାଙ୍କ କଳା ଯୋଗୁଁ ଏବେ ତାଙ୍କୁ ପିଏମ ମୋଦିଙ୍କ ସହ ବାର୍ତ୍ତାଳାପ କରିବା ପାଇଁ ‘ମନ୍ କି ବାତ୍’ କାର୍ଯ୍ୟକ୍ରମରୁ ନିମନ୍ତ୍ରଣ ଆସିଛି । ପ୍ରଥମେ ସେ କେବଳ ଏହି ସବୁ ଅଦରକାରୀ ବସ୍ତୁ ଉପରେ ଆର୍ଟ କରୁଥିଲେ । କିନ୍ତୁ ପରେ ତାଙ୍କ ଆଗ୍ରହ ବଢିଲା ଓ ସେ ସେହି ସବୁରୁ ଘରୋଇ ଉପକରଣ ଆଦି ତିଆରି କରିବାକୁ ଚେଷ୍ଟା କଲେ । ଆଉ ଏବେ ସେ ଅନେକ ଘରକରଣା ଜିନିଷ ପ୍ରସ୍ତୁତ କରୁଛନ୍ତି । କାହ୍ନୁ ନାମରେ ପରିଚିତ ଚିତ୍ତରଞ୍ଜନ ଏହି ସ୍ଵତନ୍ତ୍ର କଳା ପାଇଁ ଚର୍ଚ୍ଚାକୁ ଆସିଛନ୍ତି ।
ପିଲାଦିନୁ କଳା ପ୍ରତି ଖୁବ ଆଗ୍ରହୀ ଥିଲେ ଚିତ୍ତରଞ୍ଜନ । ବାହାଘର ଏବଂ ବ୍ରତଘର ଆଦିରେ ଚିତ୍ରାଙ୍କନ କରି ପରିବାର ଗୁଜୁରାଣ ମେଣ୍ଟାଉଥିବା ଚିତ୍ତରଞ୍ଜନ ଏହାକୁ ନିଜ ପେଶା କରିଛନ୍ତି । କିନ୍ତୁ ବିକ୍ରି ପାଇଁ ବଜାର ନଥିବାରୁ ସେ ମନ ଊଣା କରିଛନ୍ତି । ତଥାପି ଏହି କଳାର ପ୍ରଚାର ଏବଂ ପ୍ରସାର ପାଇଁ ସେ ଆହୁରି ୫୦ ଜଣ ପିଲାଙ୍କୁ ମଧ୍ୟ ଏହି କଳା ଶିକ୍ଷା ଦେଉଛନ୍ତି । ସେ ନିଜ ହାତରେ ହିଁ ଏହିସବୁ କରୁଥିବାରୁ ଏହା ସାମାନ୍ଯ ସମୟ ବହୁଳ ଅଟେ । ସ୍ଥାନୀୟ ଲୋକେ ପ୍ରଥମେ ତାଙ୍କର ଏହି କଳାକୁ ଏତେ ସହଜରେ ଗ୍ରହଣ କରୁ ନଥିଲେ ।
କିନ୍ତୁ ଧୀରେ ଧୀରେ ସୁନ୍ଦର କଳାକୃତି ଦେଖି ଏହିପ୍ରତି ଲୋକଙ୍କ ଆଗ୍ରହ ବଢୁଛି ଓ ଖୁବ ପସନ୍ଦ ମଧ୍ୟ କରୁଛନ୍ତି । ଏଠୁ ସେଠୁ କାଚ ବୋତଲ ଓ ନଡିଆ ଷଢେଇ ଗୋଟାଇବା ଦେଖି ତାଙ୍କ ଘରଲୋକ ମଧ୍ୟ ଖୁବ ବିରକ୍ତ ହେଉଥିଲେ । କିନ୍ତୁ ଏବେ ଅଦରକାରୀ ଜିନିଷରୁ ଏହିପରି ଉଚ୍ଚମାନର କଳାକୃତି ଦେଖିବା ପରେ ଗର୍ବ ଅନୁଭବ କରୁଛନ୍ତି ତାଙ୍କ ଘରଲୋକ । ଆଉ ଚିତ୍ତରଞ୍ଜନଙ୍କ କାର୍ଯ୍ୟରେ ତାଙ୍କ ଘରଲୋକ ମଧ୍ୟ ତାଙ୍କୁ ସାହାଯ୍ୟ କରୁଛନ୍ତି ।
କିନ୍ତୁ ସଠିକ ଭାବେ ବିକ୍ରି ନହୋଇ ପାରୁଥିବାରୁ ଏଭଳି ସୁନ୍ଦର କଳାକୃତି ଏବେ ତାଙ୍କ ଘରେ ଗଦା ହୋଇପଡିଛି । କିଛି ଗଣମାଧ୍ୟମଙ୍କ ଜରିଆରେ ତାଙ୍କ ଖବର ପ୍ରସାରିତ ହେବା ପରେ ସମସ୍ତେ ଧୀରେ ଧୀରେ ତାଙ୍କୁ ଚିହ୍ନିବାକୁ ଲାଗିଲେଣି । ତେବେ ସରକାରଙ୍କ ତୋସାଲି ମେଳା, ବାଲିଯାତ୍ରା ଓ ଆଦିବାସୀ ମେଳା ଆଦିରେ ତାଙ୍କ କଳା ବିକ୍ରି ହେବା ପାଇଁ ବହୁତ ସୁଯୋଗ ରହିଛି । ଯଦି ସରକାର ତାଙ୍କୁ ସାହାଯ୍ୟ କରନ୍ତି ତେବେ ସେ ସାରା ରାଜ୍ୟରେ ନିଜ କଳାକୃତି ପହଞ୍ଚାଇ ପାରିବେ ବୋଲି କହିଛନ୍ତି ।
ଆପଣଙ୍କୁ ଚିତ୍ତରଞ୍ଜନଙ୍କ ଏହି କଳାକୃତି ଭଲ ଲାଗିଥିଲେ ଅନ୍ୟମାନଙ୍କ ସହ ସେୟାର କରନ୍ତୁ ଓ ଏହିପରି ଅପଡେଟ ପାଇବା ପାଇଁ ଆମ ପେଜ୍ କୁ ଲାଇକ କରନ୍ତୁ ।