ଗାଁରେ ତିନି ବର୍ଷରେ ଥରେ ଆୟୋଜିତ ହେଉଥିବା ବାଲିଯାତ୍ରା ସତ ବର୍ଷ ଧରି ହୋଇନାହିଁ । ସେଥିପାଇଁ ଗ୍ରାମଦେବୀ ଗ୍ରାମବାସୀଙ୍କ ଉପରେ ରାଗି ଯାଇଛନ୍ତି । ଗାଁ’କୁ ଦୋଷ ଲାଗିଛି ତେଣୁ ଏହାକୁ ଦୂର କରି ଗାଁ’କୁ ସୁରକ୍ଷିତ କରିବାକୁ ହେବ । ଆଉ ଗ୍ରାମଦେବୀଙ୍କ ଯାତ୍ରାରେ ଅବହେଳା କରିବା ହେତୁ ୧୨ ଦିନରେ ୫ ମୁଣ୍ଡ ଗଡି ସରିଲାଣି । ସେଥିପାଇଁ ଏହାର ନିରାକରଣ କରିବା ପାଇଁ ଗୁରୁମାଇ ଗାଁକୁ ଆସିଛନ୍ତି । ଧୂପ ଦୀପ, ନଡିଆ, କଦଳୀ ଓ ଘଣ୍ଟଘଣ୍ଟା ସହ ପୂଜା ହେବ ।
ଗାଁରେ ଚୌକି ବୁଲିବ ଆଉ ଗାଁର ଚାରିପାଖେ କିଳା ମାରିବାକୁ ହେବ । ମା’କୁ ଦେଶୀ କୁକୁଡା, ଦେଶୀ ମଦ, ଅଣ୍ଡା ଓ ଘୁଷୁରି ଆଦି ବଳି ଦେବାକୁ ହେବ । ଗୁରୁମାଇ କହିଥିବା ସବୁ ସରଞ୍ଜାମ ଚାନ୍ଦା ଆଦାୟ କରି ଅଣାଗଲା ଏବଂ ପୂଜାବିଧି ସହକାରେ ଘୁଷୁରି ବଳି ପକାଇଲେ ଗୁରୁମାଇ । ଆଉ ଏବେ ଗାଁ’କୁ କୌଣସି ବିପଦ ଛୁଇଁ ପାରିବନି କି କାହାର ମୃତ୍ୟୁ ହେବନି । ଏହା ହେଉଛି ବିଶ୍ବାସ ଓ ଅନ୍ଧବିଶ୍ବାସ ମଝିରେ ଫସି ରହିଥିବା କିଛି ଲୋକଙ୍କ କଥା ।
ଯାହାକି ଆଜିର ଆଧୁନିକ ସମାଜକୁ ଆଶ୍ଚର୍ଯ୍ୟ କରିଦିଏ । ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ଖଣ୍ଡିଆବୁଡା ଗାଁ’ରେ ଗତ ୧୨ଦିନ ମଧ୍ୟରେ ୫ ଜଣଙ୍କର ମୃତ୍ୟୁ ହେବା ପରେ ଏବେ ଗାଁଲୋକେ ଏମିତି କିଛି ପୂଜା ଓ ବଳି ଦେଇଥିବା ସାମ୍ନାକୁ ଆସିଛି । ଏକ ଡାକ୍ତରୀ ଦଳ ଗାଁକୁ ଆସି ଫେରିବା ପରେ ଗାଁକୁ ଆସିଥିଲେ ଗୁରୁମାଇ ।
ସେ କହିଥିଲେ କି, ତିନି ବର୍ଷରେ ହେବାକୁ ଥିବା ଗାଁ ବାଲିଯାତ୍ରା ୭ ବର୍ଷ ଧରି ହୋଇ ନଥିବାରୁ ଗାଁ’ଦେବୀ ରାଗିଯାଇ ଗୋଟିଏ ପରେ ଗୋଟିଏ ମୁଣ୍ଡ ନେଉଛନ୍ତି । ସେଥିପାଇଁ ଗୁରୁମାଇଙ୍କ କଥାନୁଯାୟୀ ଆରମ୍ଭ ହୋଇଥିବା ଗାଁ’ଦେବୀଙ୍କୁ ଶାନ୍ତ କରିବାର ଯୋଜନା । ମଦ୍ୟପାନ ଦ୍ଵାରା ମୃତ୍ୟୁ ହେଉଥିବା କଥାକୁ ଗାଁ’ଲୋକେ ବିଶ୍ବାସ କରି ନଥିଲେ । ହେଲେ ଗ୍ରାମଦେବୀଙ୍କ ପ୍ରକୋପରୁ ଗାଁରେ ଜୀବନ ଯାଉଥିବା କଥାକୁ ବିଶ୍ବାସ କରି ଅନ୍ଧବିଶ୍ବାସ ଅନୁସାରେ ସମସ୍ତ ପ୍ରଥା କଲେ । ଗୋଟିଏ ନିରୀହ ଘୁଷୁରିକୁ ମଧ୍ୟ ବଳି ଦିଆଗଲା ।
ଆଉ ଏବେ ଗାଁ ପ୍ରତି କୌଣସି ବିପଦ ନଥିବା ସମସ୍ତେ ବିଶ୍ବାସ କରୁଛନ୍ତି । ମା’ଙ୍କୁ ଶାନ୍ତ କରିବା ପରେ ଗାଁ’ଲୋକେ ବି ଏବେ ଶାନ୍ତିରେ ରହିଛନ୍ତି । ଯଦି ପ୍ରଶାସନ ଆଖି ଖୋଲି ଗ୍ରାମବାସୀଙ୍କୁ ସଠିକ ସ୍ୱାସ୍ଥ୍ୟ ସେବା ଯୋଗାଇ ଦେବ ତେବବେ ଏଭଳି ପରିସ୍ଥିତି ଆସିବ ନାହିଁ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।