ସ୍ମାର୍ଟ ସିଟିର ଚାକଚକ୍ୟ ଭିତରେ ପେଟପାଟଣା ପାଇଁ କାଟିବାକୁ ପଡୁଛି ସଂଘର୍ଷମୟ ଜୀବନ । ପରିବାର ଲୋକଙ୍କ ପେଟରେ ଗଣ୍ଡେ ଦାନା ଦେବା ପାଇଁ ରାସ୍ତାକଡକୁ ଓହ୍ଲାଇଛନ୍ତି ଜଣେ ବୃଦ୍ଧ ମଉସା । ଗୋଟିଏ ହାଣ୍ଡି ଓ ଗୋଟିଏ କରଚୁଲି ସାମ୍ନାରେ ରଖିଛନ୍ତି ଓ ସେହି ହାଣ୍ଡିରେ ରଖିଛନ୍ତି ଘୁଗୁନି । ଯାହାକି ବିନା ପିଆଜ ରସୁଣରେ ପ୍ରସ୍ତୁତ କରି ଆଣନ୍ତି ମଉସା । ଗୋଟିଏ ଗୁଗୁନି ଠୋଲାର ମୂଲ୍ୟ ମାତ୍ର 15 ଟଙ୍କା ଏବଂ ସେହି ଘୁଗୁନି ଖାଇବା ପାଇଁ ଅନେକ ଦୂରରୁ ଆସନ୍ତି ଗ୍ରାହକ ।
ସିଆରପି ରାସ୍ତାକଡରେ ଘୁଗୁନି ବିକ୍ରି କରନ୍ତି ଏହି ଧଳାରଙ୍ଗର ଧୋତି ଗାମୁଛା ପିନ୍ଧା ମଉସା ସୁବାଷଚନ୍ଦ୍ର ସାହୁ । ପରିଣତ ବୟସରେ ବି ମଉସାଙ୍କ ପାଟିରୁ ବାହାରି ଯାଉଛି କି, କର୍ମ କରିବାରେ କିଛି କଷ୍ଟ ଲାଗେନି । ଓଲଟା ଲୋକଙ୍କୁ ଦେଖିଲେ ଖୁସି ଲାଗେ । ମଉସାଙ୍କ ଘର ନୟାଗଡ ଜିଲ୍ଲାରେ ହୋଇଥିବା ବେଳେ ବେଶ କିଛି ବର୍ଷ ଧରି ସେ ଭୁବନେଶ୍ଵରରେ ରହୁଛନ୍ତି ଓ ଘୁଗୁନି ଖୁଆଇ ଲୋକଙ୍କୁ ଆପାୟିତ କରୁଛନ୍ତି । ମଉସାଙ୍କ ଘରେ ତାଙ୍କ ପତ୍ନୀ ଓ ପୁଅ-ବୋହୂ ଆଦି ଅଛନ୍ତି ।
ପୁଅ ତାଙ୍କୁ ଏହି କାମରେ ସାହାଯ୍ୟ କରେ ବୋଲି କହିଛନ୍ତି ମଉସା । ବୁଢା ହେଲେବି ମଉସାଙ୍କ ଶରୀରରେ ଏବେବି ତାକତ ଅଛି ଯାହା ତାଙ୍କୁ ଦେଖିଲେ ସ୍ପଷ୍ଟ ବାରି ହେଉଛି । ବସି ଖାଇଲେ ଶାନ୍ତି ଲାଗିବନି ବୋଲି ମଉସା ବୃଦ୍ଧ ବୟସରେ ବି କାମ କରି ଦି’ ପଇସା ରୋଜଗାର କରୁଛନ୍ତି । ଏହାଛଡା ବିଭିନ୍ନ ଲୋକଙ୍କ ସହ ଦେଖା ଚାହାଁ ହୁଏ ଓ କଥାବାର୍ତ୍ତା ହେବାକୁ ମଉସାଙ୍କୁ ଭଲ ଲାଗେ ।
ଆପଣ ଜାଣିଲେ ଆଶ୍ଚର୍ଯ୍ୟ ହେବେ କି, ମଉସା ନିଜେ ଘୁଗୁନି ତିଆରି କରି ଆଣନ୍ତି ଓ ଘୁଗୁନି ବନେଇବା ପାଇଁ ପ୍ରାୟ ତିନି ଘଣ୍ଟା ସମୟ ଲାଗିଯାଏ । ମାଉସୀ ଓ ବୋହୂ କଟାକଟିରେ ମଉସାକୁ ଟିକେ ସାହାଯ୍ୟ କରିଦିଅନ୍ତି । ମଉସାଙ୍କ ହାତ ତିଆରୁ ଘୁଗୁନି ଭାରି ସ୍ଵାଦିଷ୍ଟ ବୋଲି ଲୋକେ କୁହନ୍ତି । 22 ବର୍ଷ ହେବ ମଉସା ଏହି ଘୁଗୁନି ବିକ୍ରି କରୁଛନ୍ତି । ପ୍ରଥମେ ମାତ୍ର 2 ଟଙ୍କାରେ ଘୁଗୁନି ବିକୁଥିଲେ ମଉସା । ସମୟକ୍ରମେ ତିନି ଟଙ୍କା, ପାଞ୍ଚ ଟଙ୍କା ଓ ଦଶ ଟଙ୍କାକୁ ବୃଦ୍ଧି କରିଥିଲେ ତାଙ୍କ ଘୁଗୁନି ମୂଲ୍ୟ ।
ଆଉ ଗତ 7-8 ବର୍ଷ ହେବ 15 ଟଙ୍କାରେ ଏହି ସୁଆଦିଆ ଘୁଗୁନି ବିକ୍ରି କରୁଛନ୍ତି ମଉସା । ତେବେ ଆପଣ କେବେ ସିଆରପି ଗଲେ ନିଶ୍ଚୟ ମଉସାଙ୍କ ଘୁଗୁନି ଥରେ ଖାଇବାକୁ ଭୁଲିବେନି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।