କେତେ ଇଚ୍ଛା ଥିଲା ବଡଦାଣ୍ଡରେ ଠିଆ ହୋଇ ମହାପ୍ରଭୁଙ୍କ ସବୁ ଲୀଳା ଖେଳାକୁ ଲୋକଙ୍କ ନିକଟରେ ପହଞ୍ଚାଇବେ । କିନ୍ତୁ ସବୁ ଇଚ୍ଛା କେବଳ ଇଚ୍ଛା ହୋଇ ରହିଗଲା । ସୃଷ୍ଟିର କର୍ତ୍ତାଙ୍କ ଇଚ୍ଛା ଆଗରେ ତୁଚ୍ଛ ମଣିଷ ବା କଣ କରିପାରିବ । କାଳିଆ ପାଖକୁ ଯିବାବେଳେ ଅଧବାଟରୁ ହିଁ ଚାଲିଯାଇଛି ଫଟୋ ସାମ୍ବାଦିକଙ୍କ ଜୀବନ । ରଥଯାତ୍ରାର ଫଟୋ ଉତ୍ତୋଳନ ପାଇଁ ଫଟୋ ସାମ୍ବାଦିକ ଅଶୋକ କୁମାର ପଣ୍ଡା ସକାଳୁ ସକାଳୁ ପୁରୀ ଅଭିମୁଖେ ବାହାରି ଯାଇଥିଲେ ।
କିନ୍ତୁ ସାତଶଙ୍ଖ ନିକଟରେ ଦୁର୍ଘଟଣାରେ ସବୁଦିନ ପାଇଁ ଆଖି ବୁଜି ଦେଲେ । ଘୋଷଯାତ୍ରା ପରି ମହାନ ଦିନରେ ଚାଲିଗଲେ ଜଣାଶୁଣା ଫଟୋ ସାମ୍ବାଦିକ ଅଶୋକ କୁମାର ପଣ୍ଡା । ଯାହାକୁ ନେଇ ଓଡିଆ ସାମ୍ବାଦିକ ଜଗତରେ ଶୋକର ଛାୟା ଖେଳିଯାଇଛି । ଯାହାକୁ ଦେଖିବ ତା’ ଆଖିରେ ତାଙ୍କ ପାଇଁ ଲୁହ । ଅଶୋକଙ୍କ ମୃତ୍ୟୁକୁ କେହି ବି ସହଜରେ ଗ୍ରହଣ କରି ପାରୁନାହାନ୍ତି । ତାଙ୍କ ମୃତ୍ୟୁ ସାମ୍ବାଦିକ ଜଗତ ପାଇଁ ଏକ ଅପୂରଣୀୟ କ୍ଷତି । ଯେକୌଣସି ଘଟଣା ହେଉନା କାହିଁକି ଏହି ସ୍ଥାନରେ ସବୁଠୁ ଆଗରେ ଅଶୋକ ପହଞ୍ଚି ଯାଆନ୍ତି ।
ପୋଲିସକୁ ଆଗେ ଖବର ଦିଅନ୍ତି । ତିନି ଦଶନ୍ଧିରୁ ଅଧିକ ସମୟ ଧରି ସେ ଓଡିଶାର ଜଣେ ଅଗ୍ରଣୀ ଫଟୋ ସାମ୍ବାଦିକ ଭାବେ ନାଁ କମେଇ ପାରିଥିଲେ । ୧୯୯୯ ମହାବାତ୍ୟା ସମୟରେ ନିଜ ଫଟୋଗ୍ରାଫି ପାଇଁ ସାରା ଓଡିଶାରେ ବେଶ ଚର୍ଚ୍ଚିତ ଥିଲେ ଅଶୋକ । ନିଜ ମୋଟର ସାଇକେଲରେ ସେ ବୁଲି ବୁଲି ମହାବାତ୍ୟା ସମୟରେ ଫଟୋ ଉତ୍ତୋଳନ କରିଥିଲେ । ଆଜିକୁ ୨୦ ବର୍ଷ ହେବ ପ୍ରତି ରଥଯାତ୍ରାରେ ମଧ୍ୟ ସେ ନିଜ ମୋଟର ସାଇକେଲରେ ଫଟୋ ଉଠାଇବା ପାଇଁ ଯାଆନ୍ତି ।
ଠିକ ସେହିପରି ଆଜି ସକାଳୁ ମଧ୍ୟ ନିଜ ମୋଟର ସାଇକେଲରେ ପୁରୀ ବାହାରି ପଡିଥିଲେ ଅଶୋକ । କିନ୍ତୁ ସାତଶଙ୍ଖ ନିକଟରେ ତାଙ୍କର ଦୁର୍ଘଟଣା ହେବା ପରେ ଘରକୁ ଫୋନ ଆସିଥିଲା । ଭଲ ଚିକିତ୍ସା ନିମନ୍ତେ ତାଙ୍କୁ ଭୁବନେଶ୍ବର ନେଇ ଆସିବା ପାଇଁ କହିଥିଲେ ସାଥି ସାମ୍ବାଦିକ ଭାଇମାନେ । କିନ୍ତୁ ବାଟରେ ହିଁ ତାଙ୍କ ପ୍ରାଣବାୟୁ ଉଡି ଯାଇଥିଲା । ଯାହାଫଳରେ ସାମ୍ବାଦିକ ଦୁନିଆ ଜଣେ ପ୍ରତିଭାଶାଳୀ ଫଟୋ ସାମ୍ବାଦିକଙ୍କୁ ସବୁଦିନ ପାଇଁ ହରେଇ ଦେଇଛି ।
ଅଶୋକଓ ତାଙ୍କ କାର୍ଯ୍ୟକୁ ମନେପକାଇ ସାମ୍ବାଦିକ ଭାଇମାନଙ୍କ ଆଖିରୁ ଲୁହ ଝରିପଡୁଛି । ସମସ୍ତେ କହୁଛନ୍ତି କାଳିଆ ପାଖକୁ ଯାଉଥିଲେ ଆଉ କାଳିଆ ତାଙ୍କୁ ସତରେ ତାଙ୍କ ପାଖକୁ ଡାକି ନେଇଛି । ପ୍ରଭୁ ତାଙ୍କର ଅମର ଆତ୍ମାକୁ ସଦଗତି ଦିଅନ୍ତୁ ବୋଲି ଆମର ପ୍ରାର୍ଥନା । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।