ପାରମ୍ପରିକ ପ୍ରତିଦ୍ଵନ୍ଦୀ ପାକିସ୍ତାନ ସହ ମ୍ଯାଚ ପୂର୍ବରୁ ଟିମ୍ ଇଣ୍ଡିଆ ଚାପରେ ରୁହେ କି ? ଏନେଇ କ୍ଯାପଟେନ ରୋହିତ ଶର୍ମା ଦେଲେ ବଡ ବୟାନ । ଆଇସିସି ବିଶ୍ଵକପରେ ମୁହାଁମୁହିଁ ହେବେ ଦୁଇ ଚିର ପାରମ୍ପରିକ ପ୍ରତିଦ୍ଵନ୍ଦୀ ଭାରତ ଏବଂ ପାକିସ୍ତାନ । ଏହି ହାଇ ଭୋଲଟେଜ ମ୍ଯାଚ ଉପରେ ରହିଛି ସାରା ବିଶ୍ଵର କ୍ରିକେଟପ୍ରେମୀଙ୍କ ନଜର । ଏହି ମୁକାବିଲାରେ କିଏ ବିଜୟୀ ହେବ ଏବଂ ଆଉ କିଏ ପରାଜୟ ସହ ଅଭିଯାନ ଆରମ୍ଭ କରିବ ତାହାକୁ ନେଇ କ୍ରିକେଟ ଫ୍ୟାନ୍ସଙ୍କ ମଧ୍ୟରେ ବୟାନବାଜି ଆରମ୍ଭ ହୋଇ ସାରିଲାଣି ।
ତେବେ ଏହି ବଡ ମୁକାବିଲା ପୂର୍ବରୁ ଟିମ୍ ଇଣ୍ଡିଆର ଅଧିନାୟକ ରୋହିତ ଶର୍ମା ମୁହଁ ଖୋଲିଛନ୍ତି । ଟି-୨୦ ବିଶ୍ଵକପରେ ଇଣ୍ଡିଆ ଅଭିଯାନ ଆରମ୍ଭ କରିବା ପୂର୍ବରୁ ସାମ୍ବାଦିକ ସମ୍ମିଳନୀର୍ରେ ରୋହିତ କହିଛନ୍ତି, “ଦୀର୍ଘ ୯ ବର୍ଷ ହେବ ଆମେ କୌଣସି ଆଇସିସି ଟ୍ରଫି ଜିତି ପାରିନାହୁଁ । ଏହା ନିଶ୍ଚିତ ଭାବେ ଇଣ୍ଡିଆ ପାଇଁ ନିରାଶଜନକ କଥା । ତେଣୁ ଏଥର ଟି-୨୦ ବିଶ୍ଵକପରେ କିଭଳି ଭଲ ପ୍ରଦର୍ଶନ କରିବୁ ତାହା ହିଁ ଆମ ପାଇଁ ସବୁଠୁ ବଡ ଚ୍ୟାଲେଞ୍ଜ । ତେଣୁ ସୁଯୋଗର ସଦୁପଯୋଗ କରିବାର ଆବଶ୍ୟକ ରହିଛି ।”
ତେବେ ପାକିସ୍ତାନ ବିପକ୍ଷ ମ୍ଯାଚରେ ଟିମ୍ ଇଣ୍ଡିଆ ଚାପରେ ରହିଛି କି ? ଏହି ପ୍ରଶ୍ନର ଅତି ସରଳ ଉତ୍ତର ରଖିଛନ୍ତି ରୋହିତ । ରୋହିତ କହିଛନ୍ତି, “ଚାପ ଶବ୍ଦର ବ୍ୟବହାର କରିବାକୁ ମୁଁ ଚାହୁଁନାହିଁ । ହଁ ପାକିସ୍ତାନ ଏକ ଶକ୍ତିଶାଳୀ ଟିମ୍ । କିନ୍ତୁ ଯିଏ ଭଲ ଖେଳିବ ସେ ହିଁ ମ୍ଯାଚ ଜିତିବ ।” ଏଭଳି ଉତ୍ତର ଦେଇ ଅତି ଚତୁରତାର ସହ ଏହି ପ୍ରଶ୍ନକୁ ଏଡାଇ ଯାଇଥିଲେ ରୋହିତ ଶର୍ମା ।
ଗତ ଟି-୨୦ ବିଶ୍ଵକପ ଏବଂ ଏସିଆ କପରେ ଭାରତ ପାକିସ୍ତାନ ଠାରୁ ପରାଜିତ ହେବା ପରେ କ୍ରିକେଟପ୍ରେମୀଙ୍କ ମନରେ କିଛି ଏଭଳି ପ୍ରଶ୍ନ ଉଠେ । ଯାହା ଅତି ସରଳ ଭାବେ ଉତ୍ତର ଦେଇଛନ୍ତି ରୋହିତ । ଅନ୍ୟପଟେ ୨୦୨୩ରେ ପାକିସ୍ତାନରେ ହେବାକୁ ଥିବା ଏସିଆ କପକୁ ନେଇ ଯେଉଁ ବିବାଦ ଦେଖାଦେଇଛି ତାହାକୁ ନେଇ ରୋହିତ କହିଛନ୍ତି, କେବଳ ଟି-୨୦ ବିଶ୍ଵକପ ଉପରେ ଆମର ଫୋକସ ରହିଛି । ଏହା ଆମ ପାଇଁ ଜରୁରୀ ।
ଏହାପରେ କଣ ହେବ ସେ ବାବଦରେ ଆମେ ଚିନ୍ତା କରୁନାହୁଁ । ଏହାଛଡା ଏସିଆ କପକୁ ନେଇ ବିସିସିଆଇ ନିଷ୍ପତ୍ତି ନେବ । ତେଣୁ ଆମେ ଏବେ କେବଳ ପାକିସ୍ତାନ ବିପକ୍ଷ ମ୍ଯାଚକୁ ନେଇ ରଣନୀତି ପ୍ରସ୍ତୁତ କରୁଛୁ । ଏହା ପୂର୍ବରୁ ବିସିସିଆଇ ସମ୍ପାଦକ ଜୟ ଶାହା ଏକ ବୟାନ ଦେଇ କହିଥିଲେ, “୨୦୨୩ରେ ହେବାକୁ ଥିବା ଏସିଆ କପ ପାଇଁ ଟିମ୍ ଇଣ୍ଡିଆ ପାକିସ୍ତାନ ଗସ୍ତରେ ଯିବନାହିଁ ।”
ଜୟ ଶାହାଙ୍କ ଏହି ବୟାନକୁ ନେଇ ପାକିସ୍ତାନ ଚିହିଁଙ୍କି ଉଠିଥିଲା । ଏସବୁ ବ୍ଯତୀତ ମେଲବୋର୍ଣ୍ଣରେ ଟସ୍ ବେଶ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି କହିଛନ୍ତି ରୋହିତ । କାରଣ ମେଲବୋର୍ଣ୍ଣରେ ପ୍ରତି କ୍ଷଣରେ ପାଣିପାଗ ବଦଳିଥାଏ । ମ୍ଯାଚରେ ଆଗକୁ କଣ ହେବ ସେ ବାବଦରେ ଅନ୍ଦାଜ ଲଗାଇବା କଷ୍ଟକର । କିନ୍ତୁ ପୁରା ୪୦ ଓଭର ପାଇଁ ରଣନୀତି ପ୍ରସ୍ତୁତ କରି ମଇଦାନକୁ ଓହ୍ଲାଇବୁ ବୋଲି କହିଛନ୍ତି ରୋହିତ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।