ବଙ୍ଗୋପସାଗରରେ ଭୂମିକମ୍ପ ଝଟକା ଲାଗିବା ପରେ ଦାନା ବାନ୍ଧିଥିଲା ଲଘୁଚାପ । ଏହା କ୍ରମଶଃ ଗଭୀର ଅବପାତରେ ପରିଣତ ହୋଇ ବାତ୍ୟାର ରୂପ ଧାରଣ କରିଥିବା ପାଣିପାଗ ବିଭାଗ ତରଫରୁ ସୂଚନା ମିଳିଛି । ସୃଷ୍ଟ ବାତ୍ୟାର ନାଁ ରଖାଯାଇଛି ‘ମାଣ୍ଡୁସ’ । ପାଣିପାଗ ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ ଘଣ୍ଟା ପ୍ରତି 10 କିମି ବେଗରେ ଆଗକୁ ବଢିବାରେ ଲାଗିଛି ବାତ୍ୟା ମାଣ୍ଡୁସ । ଦକ୍ଷିଣ ପଶ୍ଚିମ ବଙ୍ଗୋପସାଗରରେ ପଶ୍ଚିମ ଏବଂ ଉତ୍ତର- ପଶ୍ଚିମ ଦିଗ ଦେଇ ଏହି ସାଇକ୍ଳୋନ ଗତି କରୁଛି ।
ଏହି ବାତ୍ୟା ଟି ବର୍ତ୍ତମାନ କରାଇକୋଲ ଠାରୁ 560 କିମି ପୂର୍ବ ଏବଂ ଦକ୍ଷିଣ ପୂର୍ବ ଦିଗରେ କେନ୍ଦ୍ରୀଭୂତ ରହିଛି । ସେହିପରି ଚେନ୍ନାଇ ଉପକୂଳ ଠାରୁ 640 କିମି ପୂର୍ବ ଓ ଦକ୍ଷିଣ ପୂର୍ବ ଦିଗରେ ଏହା କେନ୍ଦ୍ରୀଭୂତ ରହିଛି । ଏହା ଧୀରେ ଧୀରେ ପଶ୍ଚିମ ଓ ଉତ୍ତର ପଶ୍ଚିମ ଦିଗରେ ଗତି କରି ଆସନ୍ତାକାଲି ଉତ୍ତର ତାମିଲନାଡୁ ଏବଂ ପୁଡୁଚେରୀ ଦେଇ ସଲଗ୍ନ ଦକ୍ଷିଣ ଆନ୍ଧ୍ର ପ୍ରଦେଶ ଉପକୂଳରେ ପହଞ୍ଚିବ ବୋଲି ପୂର୍ବାନୁମାନ କରାଯାଉଛି । ଆସନ୍ତାକାଲି ପୁଡୁଚେରୀ ଏବଂ ଶ୍ରୀହରିକୋଟା ମଝିରେ ବାତ୍ୟା ମାଣ୍ଡୁସ ସ୍ଥଳଭାଗ ଅତିକ୍ରମ କରିବ ବୋଲି ଜଣାପଡିଛି ।
ତେବେ ବାତ୍ୟା ପ୍ରଭାବରେ ଆଜି ପବନର ବେଗ ଘଣ୍ଟା ପ୍ରତି 70 ରୁ 90 କିମି ରହିବା ବେଳେ ଏହା ବୃଦ୍ଧି ପାଇଁ 100 କିମି ଛୁଇଁ ପାରେ ବୋଲି ଆଶଙ୍କା କରିଛି ଭାରତୀୟ ପାଣିପାଗ ବିଭାଗ । ତେବେ ଉପକୂଳ ଅତିକ୍ରମ କରିବା ବେଳେ ପବନର ବେଗ ଘଣ୍ଟା ପ୍ରତି 65 ରୁ 75 କିମି ଏବଂ ଝଟକା ପବନ ଘଣ୍ଟା ପ୍ରତି 85 କିମି ଛୁଇଁପାରେ ।
ଏନେଇ ପୂର୍ବରୁ ଅନୁମାନ ଓ ଆକଳନ କରିଛି ଭାରତୀୟ ପାଣିପାଗ ବିଭାଗ । ତେବେ ବାତ୍ୟା ଖବର ପ୍ରକାଶ ପାଇବା ବେଳେ ଏହାରି ଉପରେ ଏବେ ସମସ୍ତଙ୍କ ନଜର ରହିଛି । ତେବେ ବାତ୍ୟା ପ୍ରଭାବରେ ପ୍ରବଳ ବର୍ଷା ହେବାର ସମ୍ଭାବନା ରହିଥିବା ସୂଚନା ମିଳିଛି । ଆଜି ରାତି ଠାରୁ ଆରମ୍ଭ କରି 10 ତାରିଖ ପର୍ଯ୍ୟନ୍ତ ବାତ୍ୟାର ପ୍ରଭାବ ଦେଖିବାକୁ ମିଳିବ । ଖାସ କରି ଦକ୍ଷିଣ ଓ ଉତ୍ତର ତାମିଲନାଡୁ, ଦକ୍ଷିଣ ଆନ୍ଧ୍ର ପ୍ରଦେଶ, କେରଳ, କର୍ଣ୍ଣାଟକ ଉପରେ ବାତ୍ୟାର ପ୍ରଭାବ ଅଧିକ ରହିବ ବୋଲି ସୂଚନା ଦେଇଛନ୍ତି ପାଣିପାଗ ବିଶେଷଜ୍ଞ ।
ତେବେ ଓଡିଶା ଉପରେ ବାତ୍ୟାର କୌଣସି ପ୍ରଭାବ ରହିବ ନାହିଁ । ତଥାପି ଦକ୍ଷିଣ ଓଡିଶା ଜିଲ୍ଲାଗୁଡିକୁ ସତର୍କ ରହିବା ପାଇଁ ନିର୍ଦ୍ଦେଶ ଦିଆଯାଇଛି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।