“ସୀତା ଲୋ… ଆଜି ଜଳୁଛି ଯାହାର ଚିତା ଲୋ…” ଏହି ଗୀତଟି ଆପଣ ଶୁଣିଥିବେ । ୧୯୯୨ ମସିହାରେ ରିଲିଜ ହୋଇଥିବା ଲୋକପ୍ରିୟ ଓଡିଆ ଫିଲ୍ମ “ଉଦଣ୍ଡୀ ସୀତା” ଏ ଏହି ଗୀତଟି ଆଜି ବି ଲୋକେ ମନେ ରଖିଛନ୍ତି । ଗୀତଟି ସେତେବେଳେ ବହୁତ ହିଟ୍ ହୋଇଥିଲା । ସୁପରଷ୍ଟାର ଉତ୍ତମ ମହାନ୍ତି ଓ ଲୋକପ୍ରିୟ ଅଭିନେତ୍ରୀ ଅପରାଜିତା ମହାନ୍ତିଙ୍କ ଅଭିନୀତ ଏହି ଫିଲ୍ମକୁ ଦର୍ଶକେ ବେଶ ପସନ୍ଦ କରିଥିଲେ । ତେବେ ଏହି ଫିଲ୍ମର ହିଟ୍ ଗୀତ “ସୀତା ଲୋ ଆଜି ଜଳୁଛି ଯାହାର ଚିତା ଲୋ…” ଗୀତଟିକୁ ଗାଇଥିଲେ କଣ୍ଠଶିଳ୍ପୀ ଟି ସୌରୀ ।
ଓଡିଆ ମ୍ୟୁଜିକ କ୍ଷେତ୍ରରେ ତାଙ୍କର ଅନେକ ଅବଦାନ ରହିଛି । ଆଉ ଅନେକ ବର୍ଷ ପରେ ବର୍ତ୍ତମାନ କଣ୍ଠଶିଳ୍ପୀ ଟି ସୌରୀ ଓ ତାଙ୍କର ଏହି ହିଟ୍ ଗୀତକୁ ନେଇ ଅନେକ ରୋଚକ ତଥ୍ୟ ସେ ନିଜେ ସାମ୍ନାକୁ ଆଣିଛନ୍ତି । ଟି ସୌରୀଙ୍କ କହିବା ଅନୁଯାୟୀ, ସେ ଯେତେବେଳେ ତାଳଚେରରେ କଲେଜରେ ପାଠ ପଢୁଥିଲେ ସେବେଠାରୁ ସଙ୍ଗୀତ ପ୍ରତି ତାଙ୍କର ବେଶ ରୁଚି ଥିଲା । କଲେଜର ସଙ୍ଗୀତ ଦଳରେ ସେ ଗୀତ ଗାଉଥିଲେ ଏବଂ ଅନେକ ସ୍ଥାନକୁ ପ୍ରୋଗ୍ରାମ କରିବାକୁ ମଧ୍ୟ ଯାଉଥିଲେ ।
କଲେଜରେ ପଢିବା ବେଳେ ସେ ଥରେ କଟକ ଏକ ପ୍ରୋଗ୍ରାମ କରିବାକୁ ଆସିଥିଲେ । ଯାହାକୁ ସଙ୍ଗୀତ ନିର୍ଦ୍ଦେଶକ ସ୍ୱରୂପ ନାୟକଙ୍କ ଘର କାଫଲା ବଜାର ନିକଟରେ ଆୟୋଜିତ ହୋଇଥିଲା । ପ୍ରୋଗ୍ରାମ ଶେଷ ହେବା ପରେ ତାଙ୍କୁ ସ୍ୱରୂପ ନାୟକ ଡକାଇ ପଠାଇଥିଲେ । ଟି ସୌରୀଙ୍କ କଣ୍ଠ ତାଙ୍କୁ ଏତେ ପସନ୍ଦ ହୋଇଥିଲା ଯେ ସେ ହିଁ ପ୍ରଥମେ ତାଙ୍କୁ ଗୀତ ଗାଇବା ପାଇଁ ସୁଯୋଗ ଦେଇଥିଲେ । ତାଙ୍କୁ ଯେମିତି ଗାଇବା ପାଇଁ କୁହା ଯାଇଥିଲା ସେହି ଅନୁସାରେ ଟି ସୌରୀ ଗୀତ ଗାଇଥିଲେ ।
ଆଉ ଗୀତଟି ମାର୍କେଟକୁ ଆସିବା ପରେ ଲୋକଙ୍କ ମନକୁ ବେଶ ଛୁଇଁଥିଲା । ସେଥିପାଇଁ ଟି ସୌରୀ କୁହନ୍ତି କି, ତାଙ୍କ ଚେଷ୍ଟା ଓ ପରିଶ୍ରମ ସହ ଭାଗ୍ୟ ଏବଂ ଭଗବାନଙ୍କ ଆଶୀର୍ବାଦ ତାଙ୍କ ଉପରେ ଥିଲା । ତେଣୁ ସେ ଏତେ ଛୋଟ ବଯସରୁ ଏଭଳି ସୁଯୋଗ ପାଇ ପଡ଼ିଥିଲେ ଏବଂ ଗୀତଟି ହିଟ୍ ମଧ୍ୟ ହୋଇଥିଲା । ଏହାପରେ ବୁଝି ସାରିଥିଲେ ଯେ ସିଙ୍ଗର ହେବା ହିଁ ତାଙ୍କର ଭାଗ୍ୟ । ଏହାବ୍ୟତୀତ ସେ ଆଉ କିଛିରେ ସଫଳ ହୋଇପାରିବେ ନାହିଁ ।
ଓଡିଆ ମ୍ୟୁଜିକ ଇଣ୍ଡଷ୍ଟ୍ରିରେ ନାଁ କମେଇବା ଆଗରୁ ସେ ତାଙ୍କ ଜୀବନରେ ବହୁତ ସଂଘର୍ଷ ଓ ଅଭାବ ଅସୁବିଧା ଦେଇ ମଧ୍ୟ ଗତି କରିଛନ୍ତି । ତେବେ ତାଙ୍କର ଶୃଙ୍ଖଳିତ ଜୀବନଶୈଳୀ ଯୋଗୁଁ ସେ ଆଜିବି ଏକଦମ ପୂର୍ବ ଭଳି ଦେଖାଯାନ୍ତି ବୋଲି କୁହନ୍ତି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।