ପାଠ ପଢିବା ପାଇଁ ଅନେକ ଇଚ୍ଛା ଓ ଆଗକୁ ବଢିବା ପାଇଆନ ରହିଛି ବଡ ବଡ ଲକ୍ଷ୍ୟ । ହେଲେ ଅଭାବ ଅନଟନ ପଛରୁ ଗୋଡକୁ ଟାଣି ଧରୁଛି । ପାଦରେ ବେଦି ଭଳି ଲାଗି ରହିଛି ଘୋର ଆର୍ଥିକ ସମସ୍ଯା । ଯାହାକି ଯେତେ ଚେଷ୍ଟା କଲେନି ଆଗକୁ ବଢିବାକୁ ଦେଉନି । କେମିତି ବା ଆଗକୁ ବଢିବେ ! କାରଣ ରୋଜଗାରିଆ ବାପା ପରା ଦୁଇ ଝିଅ ଓ ସ୍ତ୍ରୀକୁ ଛାଡି ଆରପାରିକୁ ଚାଲିଯାଇଛି । କାମ ଦେଇଥିବା ମାଲିକ ବାପାକୁ ମାରିଦେଇଛି । ଏମିତି ଏକ ଦୁଃଖଭରା କାହାଣୀ ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା କୁବୁସାହି ଗାଁରେ ।
କୁବୁସାହି ଗାଁର ବାସୁଦେବଙ୍କ ପରିବାର ଇଏ ହେଉଛି ହୃଦୟ ବିଦାରକ କାହାଣୀ । ବାସୁଦେବଙ୍କ ଛୋଟିଆ ସଂସାରରେ ଦୁଇ ଝିଅଙ୍କ ପାଠପଢା ଭଲରେ ଚାଲିଥିଲା । ସେ ଯାହା ରୋଜଗାର କରୁଥିଲେ ସେଥିରେ ଭଲରେ ଚଳୁଥିଲେ ଚାରି ପ୍ରାଣୀ । ହେଲେ ବାସୁଦେବଙ୍କ ମାଲିକ ସବୁକିଛି ଉଜାଡିଦେଲା । ବାସୁଦେବ ଏକ କବାଡିଆ ଦୋକାନରେ କାମ କରୁଥିଲେ । ହେଲେ କୌଣସି କାରଣରୁ ଦୋକାନ ମାଲିକ ରବି ମୁଦୁଲି ତାଙ୍କୁ ମାରି ପାଖ ନଦୀରେ ଫିଙ୍ଗିଦେଲା ।
ଆଉ ସେବେଠାରୁ ଅଭାବ ଅନଟନରେ ଚଳୁଛନ୍ତି ପୁରା ପରିବାର । ମୃତ ବାସୁଦେବଙ୍କ ବଡଝିଅ ଲକ୍ଷ୍ମୀପ୍ରିୟା ପ୍ରାଣନାଥ କଲେଜରୁ +2 ପାସ୍ କରିଥିବା ବେଳେ ସାନଝିଅ ଗାୟତ୍ରୀ କୁବୁସାହି ହାଇସ୍କୁଲରୁ ମାଟ୍ରିକ ପାସ୍ କରିଛନ୍ତି । ଦୁଇ ଝିଅଙ୍କର ପାଠ ପଢିବାକୁ ଅନେକ ଆଗ୍ରହ ରହିଥିଲେ ବି ଗୋଡ ଟାଣି ଧରୁଛି ଆର୍ଥିକ ସମସ୍ଯା ।
ସେପଟେ ମା ଅମୀୟବାଳା ମଧ୍ୟ ଦୁଇ ଝିଅକୁ କେମିତି ବଡ କରିବେ ମୁଣ୍ଡରେ ହାତ ଦେଇ ବସିଛନ୍ତି । ବାପା ଚାଲିଯିବା ପରେ ପରିବାର ଉପରେ ଦୁଃଖର ବିଝା ମାଡି ବସିଛି । ସବୁ ଯେମିତି ଏକଦମ ବଦଳି ଯାଇଛି । ପାଠପଢାରେ ଡୋରି ବନ୍ଧା ହୋଇଥିଲେ ବି ମନରେ ଅନେକ ଆଶା ଓ ପ୍ରତୀକ୍ଷା ରହିଛି । ସରକାରଙ୍କ ରାସନ ଏବେ ଚଳିବା ପାଇଁ ଏକମାତ୍ର ଭରସା । ଯାହା ଚାଉଳ ଆସୁଛି ତାକୁ ରାନ୍ଧି ସେଥିରେ ଖଟା ଲଗେଇ ଖାଉଛନ୍ତି ମା ଝିଅ ତିନିଜଣ ।
ଭୂମିହୀନ ଯୋଜନାରେ ଖଣ୍ଡେ ଜମି ଓ ଆବାସ ଯୋଜନାରେ ଏମାନେ କିଭଳି ଘର ଖଣ୍ଡେ ପାଇବେ ସେନେଇ ସ୍ଥାନୀୟ ଲୋକେ ଭିକ୍ଷା କରିଛନ୍ତି । କେବେ ଏହି ଅଭାବ ଅନଟନର ଅନ୍ତ ଘଟିବ ଆଖିରେ ଅସୁମାରୀ ଆଶା ଓ ସ୍ଵପ୍ନ ନେଇ ଚାହିଁ ବସିଛନ୍ତି ଏହି ଦୁଇ ଝିଅ । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।