ଦେଶର ସର୍ବୋଚ୍ଚ ପଦ ରାଷ୍ଟ୍ରପତି ଆସନ ପାଇଁ ପ୍ରତିଯୋଗୀତା ଆରମ୍ଭ ହୋଇ ସାରିଥିବା ବେଳେ ଏହା ଉପରେ ଏବେ ସମସ୍ତଙ୍କ ନଜର ରହିଛି । ଏଥର ଆମ ଓଡିଶାର ମହିଳା ଦ୍ରୌପଦୀ ମୁର୍ମୁଙ୍କୁ ଏନଡ଼ିଏ ରାଷ୍ଟ୍ରପତି ପ୍ରାର୍ଥୀ ଭାବେ ଚୟନ କରିଛି । ଯାହା ଆମ ଓଡିଶା ପାଇଁ ଏକ ଗର୍ବ ଏବଂ ଗୌରବର ବିଷୟ ସାଜିଛି । ଏହାକୁ ନେଇ କିନ୍ତୁ ରାଜ୍ୟ ରାଜନୀତିରେ ହଇଚଇ ସୃଷ୍ଟି ହୋଇଛି । ବିଜେଡି ଦ୍ରୌପଦୀଙ୍କୁ ସମର୍ଥନ ଘୋଷଣା କରି ସାରିଛି ।
ଓଡିଶା ଝିଅ ରାଷ୍ଟ୍ରପତି ପଦବୀ ପାଇଁ ଚୟନ ହେବା ପରେ ରାଜ୍ୟରେ ସମସ୍ତେ ଖୁସି ହେଉଛନ୍ତି ଓ ଦ୍ରୌପଦୀଙ୍କ ବିଜୟ ହେଉ ବୋଲି ସମସ୍ତେ ଚାହାନ୍ତି । ରାଜ୍ୟ କଂଗ୍ରେସ ପାଇଁ କିନ୍ତୁ ଏହା ଅଡୁଆ ପରିସ୍ଥିତି ସୃଷ୍ଟି କରିଛି । କାରଣ ଜାତୀୟ କଂଗ୍ରେସ ଦ୍ରୌପଦୀଙ୍କ ବିପକ୍ଷରେ ଠିଆ ହୋଇଥିବା ଯଶବନ୍ତ ସିହ୍ନାଙ୍କୁ ନିଜର ସମର୍ଥନ ଜଣାଇଛି ।
ଯେଉଁଥି ପାଇଁ ରାଜ୍ୟ କଂଗ୍ରେସ ମଧ୍ୟ ଯଶବନ୍ତଙ୍କୁ ସମର୍ଥନ ଜଣାଇବା ପାଇଁ ବାଧ୍ୟ ହେବ । ଏହାକୁ ନେଇ କଂଗ୍ରେସ ବିଧାୟକ ସୁରେଶ ରାଉତରାୟ ପୂର୍ବରୁ ନିଜ ମନ୍ତବ୍ୟ ରଖିଥିଲେ । ସେ ଦ୍ରୌପଦୀଙ୍କୁ ଆଗରୁ ଜାଣିଛନ୍ତି ଓ ତାଙ୍କ ପାଇଁ ବହୁତ ଖୁସି ଅଛନ୍ତି ବୋଲି କହିଥିଲେ । କିନ୍ତୁ ଦ୍ରୌପଦୀଙ୍କୁ ସମର୍ଥନ ଜଣାଇବେ କି ନାହିଁ ପଚରା ଯିବାରୁ ସେ କହିଥିଲେ କି ଦଳର ମୁଖିଆ ସୋନିଆ ଗାନ୍ଧୀ ଯାହା କହିବେ ସେମାନେ ତାହା ମାନିବାକୁ ବାଧ୍ୟ ।
ତେଣୁ ଦ୍ରୌପଦୀଙ୍କୁ ସମର୍ଥନ କରିବେ କି ନାହିଁ ସେ କହିପାରିବେ ନାହିଁ । ସେ ନିଜକୁ ପାର୍ଟିର ଜଣେ ଶୃଙ୍ଖଳିତ ସଦସ୍ୟ ବୋଲି କହିବା ସହ ଏହି ମାମଲାରେ ତାଙ୍କ ପାଇଁ ଆଗ ପାର୍ଟି ଓ ତା’ପରେ ଯାଇ ମାଟି ବୋଲି କହିଥିଲେ । ଏବେ କିନ୍ତୁ ତାଙ୍କ ମନ୍ତବ୍ୟରେ ପରିବର୍ତ୍ତନ ହୋଇଥିବା ଦେଖିବାକୁ ମିଳିଛି ।
କଂଗ୍ରେସ ଦ୍ରୌପଦୀଙ୍କୁ ସମର୍ଥନ କରିବ ନାହିଁ ବୋଲି ସ୍ପଷ୍ଟ ହୋଇଥିବା ବେଳେ ସୁର ଭାଇ ଦଳକୁ ନେଇ ବିବାଦୀୟ ମନ୍ତବ୍ୟ ଦେଇଛନ୍ତି । ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବା ପାଇଁ ସେ ସୋନିଆ ଗାନ୍ଧୀଙ୍କ ନିକଟକୁ ଚିଠି ଲେଖିବେ ବୋଲି କହିଛନ୍ତି । ଦ୍ରୌପଦୀ ମୁର୍ମୁ ଓଡିଆ ଝିଅ ହୋଇଥିବାରୁ ସେ ତାଙ୍କୁ ସମର୍ଥନ କରିବାକୁ ଚାହାନ୍ତି ବୋଲି କହିଛନ୍ତି ।
ନିଜ ବିବେକ ଅନୁଯାୟୀ ସେ ଭୋଟ ଦେବେ କହିଛନ୍ତି ଓ ଦଳ ପାଖରେ ଏହିପରି ଏକ ବିବାଦୀୟ ପ୍ରସ୍ତାବ ରଖିଛନ୍ତି । ଯାହାକୁ ନେଇ ଚର୍ଚ୍ଚା ଜୋର ଧରିଛି । ଯେଉଁଥି ପାଇଁ କଂଗ୍ରେସ ବର୍ତ୍ତମାନ ଦୁଇ ଫାଳ ସ୍ଥିତିରେ ଥିବା ଦେଖିବାକୁ ମିଳୁଛି । ତେବେ ଆଗକୁ ମାମଲା କଣ ହେବ ଏହା ଉପରେ ଏବେ ସମସ୍ତଙ୍କ ନଜର । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।