ଦେଢ ମାସ ତଳେ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଥିଲା ମଡେଲ ଏବଂ ଯୁବ ବ୍ୟବସାୟୀ ସୌମ୍ଯ ରଞ୍ଜନ ପାଣିଗ୍ରାହୀଙ୍କ ଆତ୍ମହତ୍ୟା ମାମଲା । ସେ ନିଜ ଯେଉଁ ହାତଲେଖା ନୋଟ ଛାଡି ଯାଇଥିଲେ ତାକୁ ନେଇ ସବୁଆଡେ ଚର୍ଚ୍ଚା ହେଉଥିଲା । ସୌମ୍ଯ ଆତ୍ମହତ୍ୟା କରିବା ପୂର୍ବରୁ ପ୍ରେମିକା ସୋନାଲି ନନ୍ଦଙ୍କ ବିଶ୍ଵାସ ଘାତକତା ଓ ତାଙ୍କ ପ୍ରତି କୁଆଚରଣକୁ ଗୋଟି ଗୋଟି କରି ଲେଖି ଯାଇଛନ୍ତି । କିଭଳି ଭାବେ ସୋନାଲି ତାଙ୍କ ଭାବନା ସହ ଖେଳିଛନ୍ତି ଓ ତାଙ୍କ ଭଲ ପାଇବାକୁ ଧିକ୍କାର କରିଛନ୍ତି ସେସବୁ ସୌମ୍ଯ ଲେଖିଥିଲେ ।
ସୋନାଲିଙ୍କ ଧୋକାକୁ ସହି ନପାରି ସୌମ୍ଯ ଆତ୍ମହତ୍ୟା କରୁଥିବା ସେ ନିଜେ ଲେଖିଥିଲେ । ସୌମ୍ଯ ଏବଂ ସୋନାଲି ଗତ ଦୁଇ ବର୍ଷ ଧରି ପ୍ରେମ ସମ୍ପର୍କରେ ଥିଲେ ଓ ଉଭୟଙ୍କ ପରିବାରର ଲୋକେ ମଧ୍ୟ ଏ ସମ୍ପର୍କରେ ଅବଗତ ଥିଲେ । ସୌମ୍ୟଙ୍କ ପରିବାର ସହ ସୋନାଲି ଅନେକ ସମୟ ମଧ୍ୟ ବିତାଉଥିଲେ । ସୌମ୍ଯଙ୍କ ମା’ ମଧ୍ୟ ସୋନାଲିଙ୍କୁ ଖୁବ୍ ଭଲ ପାଉଥିବା କଥା ସୋନାଲିଙ୍କ ମା ନିଜେ ସ୍ଵୀକାର କରିଥିଲେ । ଏହାସହ ସୌମ୍ଯଙ୍କ ଆତ୍ମହତ୍ୟା ପୂର୍ବର ଶେଷ କଥାବାର୍ତ୍ତା ମଧ୍ୟ ସୋସିଆଲ ମିଡିଆରେ ଘୁରି ବୁଲୁଥିଲା ।
ସୌମ୍ଯ କାନ୍ଦି କାନ୍ଦି ସୋନାଲିଙ୍କ ସହ କଥା ହେଉଥିବା ବେଳେ ସୋନାଲି ଅତ୍ୟନ୍ତ ରୁକ୍ଷ ସ୍ଵରରେ ସୌମ୍ଯଙ୍କ ସହ କଥା ହେଉଥିବା ଶୁଣିବାକୁ ମିଳିଥିଲା । ସୌମ୍ଯ ଓ ସୋନାଲିଙ୍କ ଅଡିଓ କଲ୍ ରେକର୍ଡ, ସୌମ୍ଯଙ୍କ ସୁଇସାଇଡ ନୋଟ ଏବଂ ଆହୁରି ଅନେକ ଘଟଣାକୁ କେନ୍ଦ୍ର କରି ସୋନାଲି ହିଁ ସୌମ୍ଯଙ୍କୁ ଆତ୍ମହତ୍ୟା ପାଇଁ ପ୍ରବର୍ତ୍ତାଇ ଥିବା ତାଙ୍କ ପରିବାର ଲୋକେ ଅଭିଯୋଗ ଆଣିଥିଲେ ।
କିନ୍ତୁ ଅନେକ ଦୌଡାଦୌଡି କରିବା ପରେ ମଧ୍ୟ ପୋଲିସ ସେମାନଙ୍କ ଅଭିଯୋଗ ଗ୍ରହଣ କରି ନଥିଲା । କିନ୍ତୁ ସୌମ୍ୟଙ୍କ ପରିବାର ଆରମ୍ଭରୁ କହି ଆସୁଥିଲେ କି ଡେରିରେ ହେଲେବି ତାଙ୍କ ପୁଅକୁ ନିଶ୍ଚୟ ନ୍ୟାୟ ମିଳିବ, ଆଇନ ଉପରେ ତାଙ୍କର ସଂପୂର୍ଣ୍ଣ ଭରସା ଅଛି । ଆଉ ସେହି ଭରସା ଏବେ ପୁନର୍ଜୀବିତ ହେବାର ଦେଖିବାକୁ ମିଳିଛି । ସୋମ୍ୟଙ୍କ ପରିବାର ହାଇକୋର୍ଟରେ ନ୍ୟାୟ ପାଇଁ ଆବେଦନ କରିବା ପରେ ହାଇକୋର୍ଟଙ୍କ ନିର୍ଦ୍ଦେଶରେ ଇନଫୋସିଟି ଥାନା ପୋଲିସ ସୋନାଲିଙ୍କ ନାଁରେ ଏକ ମାମଲା ରୁଜୁ କରିଛି ।
ଯାହାକୁ ନେଇ ସୌମ୍ଯଙ୍କ ପରିବାର ଲୋକେ ବେଶ ଖୁସି ଅଛନ୍ତି ଏବଂ ସୋନାଲି ଯାହାବି ହେଲେ ଦୋଷୀ ସାବ୍ୟସ୍ତ ହେବା ଦରକାର ବୋଲି ସେମାନେ କହିଛନ୍ତି । ସୋନାଲି କାଠଗଡାକୁ ଆସୁ ଏବଂ ତା’ ହାତରେ ହାତକଡି ପଡିଲେ ଯାଇ ସୌମ୍ଯଙ୍କୁ ଉଚିତ ନ୍ୟାୟ ମିଳିବ ବୋଲି ସେମାନେ କହୁଛନ୍ତି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।