ପ୍ରଥମାଷ୍ଟମୀ ଓଡିଶାର ଏକ ପାରମ୍ପାରିକ ପର୍ବ ଓ ଏହି ପର୍ବର ଅନେକ ମାହାତ୍ମ୍ଯ ରହିଛି । ମାର୍ଗଶିର ମାସ କୃଷ୍ଣପକ୍ଷ ଅଷ୍ଟମୀ ତିଥିରେ ଏହି ପର୍ବ ପ୍ରତ୍ଯେକ ଓଡିଆ ଘରେ ପାଳିତ ହୋଇଥାଏ । ବିଶ୍ବାସ ରହିଛି ପୂର୍ବକାଳରେ ଯେହେତୁ ମାର୍ଗଶିର ମାସ ବର୍ଷର ପ୍ରଥମ ମାସ ଭାବେ ପରିଗଣିତ ହେଉଥିଲା ସେଥିପାଇଁ ଏହି ମାସର ପ୍ରଥମ କୃଷ୍ଣପକ୍ଷ ଅଷ୍ଟମୀକୁ ପ୍ରଥମାଷ୍ଟମୀ ବୋଲି କୁହାଯାଏ । ମାର୍ଗଶିର ମାସ ମା ଲକ୍ଷ୍ମୀଙ୍କ ମାସ ତଥା ଶ୍ରେଷ୍ଠ ମାସ ବୋଲି ମଧ୍ୟ କୁହାଯାଏ ।
ଏହି ମାସରେ ପ୍ରତ୍ଯେକ ଗୁରୁବାର ଯେପରି ମାଣବସାଇ ମା ଲକ୍ଷ୍ମୀଙ୍କୁ ପୂଜା କରାଯାଏ ସେହିଭଳି ପ୍ରଥମାଷ୍ଟମୀର ମଧ୍ୟ ଖୁବ୍ ମହତ୍ଵ ରହିଛି । ଏହିଦିନ ଘରର ପ୍ରଥମ ପୁତ୍ର ଏବଂ କନ୍ୟା ମାନଙ୍କୁ ଘରର ମୁରବୀମାନେ ବନ୍ଦାପନା କରିବାର ପରମ୍ପରା ରହିଛି । ଘରର ପ୍ରଥମ ସନ୍ତାନକୁ ଏହି ଅଷ୍ଟମୀରେ ପୂଜା କରା ଯାଉଥିବାରୁ ମଧ୍ୟ ଏହାର ନାମ ପ୍ରଥମାଷ୍ଟମୀ ରହିଛି । ଏହିଦିନ ମାମୁଁମାଇଁଙ୍କ ଘରୁ ମଧ୍ୟ ଘରର ଜ୍ୟେଷ୍ଠ ସନ୍ତାନଙ୍କ ପାଇଁ ନୂଆ ଲୁଗା, ପିଠା ଓ ମିଠା ଆଦି ଆସିଥାଏ ।
ସେହି ସବୁକୁ ବ୍ୟବହାର କରି ଘରର ମହିଳାମାନେ ଜ୍ୟେଷ୍ଠ ସନ୍ତାନଙ୍କୁ ବନ୍ଦାପନା କରନ୍ତି । ଏହିଦିନ ହଳଦୀ ପତ୍ରରେ ତିଆରି ପିଠାର ମଧ୍ୟ ଖୁବ୍ ମହତ୍ଵ ରହିଛି । ଓଡିଶାର ଏହି ପାରମ୍ପାରିକ ପିଠା ଖୁବ ସୁଆଦିଆ । ଏହି ପିଠା ଖାଇବା ପାଇଁ ସମସ୍ତେ ଏହିଦିନକୁ ନେଇ ରହିଥାନ୍ତି । ତେବେ ଯେହେତୁ ଘରର ଜ୍ୟେଷ୍ଠ ପୁତ୍ର ଏବଂ କନ୍ୟାଙ୍କ ପାଇଁ ଏହି ପର୍ବ ପାଳନ କରାଯାଏ ଓ ସେହି ମାନଙ୍କ ପାଇଁ ନୂଆ ଲୁଗା ଆସେ ତେଣୁ କନିଷ୍ଠ ସନ୍ତାନ ମାନେ ଏହିଦିନ ପାଳନ କରନ୍ତି ନାହିଁ ।
ଅନେକ ସମୟରେ ଘରର କନିଷ୍ଠ ସନ୍ତାନ ମାନେ ଏଥିପାଇଁ ମନ ଊଣା କରୁଥିବାର ମଧ୍ୟ ଦେଖିବାକୁ ମିଳେ । ତେବେ ନିକଟରେ ପ୍ରଥମାଷ୍ଟମୀ ଯାଇଥିବା ବେଳେ ଏକ ଛୋଟ ପିଲାଟିର ଭିଡିଓ ଏବେ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି । ପିଲାଟି ପ୍ରଥମାଷ୍ଟମୀର ନିୟମକୁ ନେଇ ମନ ଊଣା କରି ଏକ ଭିଡିଓ ପ୍ରସ୍ତୁତ କରିଛି । ଯାହା ଘରର ସବୁ କନିଷ୍ଠ ସନ୍ତାନସନ୍ତତିଙ୍କ ମନକୁ ପାଉଛି ।
ଏହି ଭିଡିଓରେ ଆପଣ ଦେଖି ପାରୁଥିବେ ଗୋଟିଏ ଛୋଟ ପିଲାଟି କିପରି କହୁଛି, ‘ଆମେ କଣ ଘର ସାନ ବୋଲି ଆମେ କଣ ଖାଲି ପିଠା ଖାଇବୁ ? ବହୁତ ବାଧୁଛି… ମୋ ସାଙ୍ଗମାନେ କହୁଛନ୍ତି ତୁ ତିନି ନମ୍ବର, ତୁ ଅଷ୍ଟମୀ ହବୁନି । ତେଣୁ ବାପା ମା ମାନଙ୍କୁ ଅନୁରୋଧ କରୁଛି ସାନ ପୁଅ ପାଇଁ ଖଣ୍ଡେ ଖଣ୍ଡେ ଡ୍ରେସ ଆଣ ।”
ଏହି ଭିଡିଓରେ ଘରର ପ୍ରତ୍ଯେକ ସାନ ପୁଅ ଓ ଝିଅଙ୍କ ମନ କଥା ପ୍ରକାଶ କରିଛି ଏହି ପୁଅଟି । ତେଣୁ ଏହି ଭିଡିଓଟି ଆସିବା ପରେ ଖୁବ୍ ଭାଇରାଲ ହେବାରେ ଲାଗିଛି । ଆପଣଙ୍କୁ କେମିତି ଲାଗିଲା ଏହି ସାନ ପୁଅଟିର କଥା ଆମକୁ କମେଣ୍ଟ କରି ଜଣାନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍କୁ ଲାଇକ କରନ୍ତୁ ।