ଅଣ୍ଡା ଖାଇବାକୁ ଦେଲେନି କି ନଳକୂପରେ ହାତ ଚାପି ହୋଇ ଆଙ୍ଗୁଠି ଫାଟିଯିବା ପରେ ଡାକ୍ତରଖାନା ବି ନେଲେନି ସ୍କୁଲ ଦିଦି । ଏପରିକି ପିଲାର ଆଙ୍ଗୁଠି ଫାଟି ଯାଇଛି ବୋଲି ତା’ ଘରଲୋକ ସୁଦ୍ଧା ଜଣାଇଲେ ନାହିଁ । ଏନେଇ ପଚାରିବାରୁ ଦିଦି କହିଲେ, ପିଲାଟା ଦୁଷ୍ଟ ହେଉଛି ପାଠ ପଢୁନି ସେଥିପାଇଁ ତାକୁ ଡରାଇବାକୁ ଅଣ୍ଡା ଦେଲିନି । ଅନ୍ୟ ଲୋକଙ୍କ ଠାରୁ ପୁଅର ଖବର ପାଇ ମାଆ ଆସି ଦେଖେ ତ ପୁଅର ଅବସ୍ଥା ଏମିତି ।
ଦି’ ଅକ୍ଷର ପାଠ ପଢିବା ପାଇଁ ଆଉ ସାଙ୍ଗସାଥିଙ୍କ ସହ ଖେଳି ବୁଲି ଚାଲାଖ ହେବ ବୋଲି କୁନି ପିଲାକୁ ସ୍କୁଲକୁ ଛାଡିଛି ମାଆ । ପିଲାଙ୍କ ପୁଷ୍ଟି ସାଧନ ପାଇଁ ତାଙ୍କୁ ଅଣ୍ଡା ଦେବାକୁ ଯୋଜନା କରିଛନ୍ତି ସରକାର । ହେଲେ ପାଞ୍ଚ ଛଅ ପାଳି ହେଲା ପିଲାକୁ ଅଣ୍ଡା ନଦେଇ ଖାଲି ଡାଲି ପାଣି ଦେଉଛନ୍ତି ଦିଦି । ସବୁ ପିଲା ଅଣ୍ଡା ଖାଇବା ବେଳେ କୁନି ପିଲାଟି ମନ ଦୁଃଖରେ ଅନେଇ ବସୁଛି । ଏହା ହେଉଛି ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ ଲକ୍ଷ୍ମୀନାରାୟଣପୁର ଗ୍ରାମର ସରକାରୀ ପ୍ରାଥମିକ ବିଦ୍ୟାଳୟର ଘଟଣା ।
କୁନି ପିଲାଟି ମାତ୍ର ଦ୍ଵିତୀୟ ଶ୍ରେଣୀର ଛାତ୍ର । ଅଭିଯୋଗ ଅନୁସାରେ ଦୀର୍ଘ ଦିନ ସ୍କୁଲର ପ୍ରଧାନ ଶିକ୍ଷୟତ୍ରୀ ରମା ସବର ପିଲାଟିକୁ ଅଣ୍ଡା ନଦେଇ ଖାଲି ଭାତ ଆଉ ଡାଲି ପାଣି ଦେଇ ଆସୁଛନ୍ତି । ଏ ବାବଦରେ ଖବର ନେବା ପାଇଁ ଗଣମାଧ୍ୟମ ପ୍ରତିନିଧି ପ୍ରଶ୍ନ କଲା ବେଳକୁ ଚିହିଁଙ୍କି ଉଠୁଛନ୍ତି ଦିଦି । ଘଟଣା କଣ ହୋଇଛି ଏ ବାବଦରେ କହିବା ବଦଳରେ ଓଲଟି ସାମ୍ବାଦିକଙ୍କ ଫଟୋ ଉଠାଇ ରଖୁଛନ୍ତି ଦିଦି । ପରିଚୟ ପଚାରିଲେ ବି ଦିଦି ନକହି ଓଲଟା ତାଙ୍କ ନାଁରେ ଏସବୁ ମିଥ୍ୟା ଅଭିଯୋଗ ବୋଲି କହୁଛନ୍ତି ।
ପିଲାଟି ଖାଇସାରି ନଳକୂପରେ ହାତ ଧୋଉଥିବା ବେଳେ ତା’ ହାତ ଭୁଲବଶତଃ ଚାପି ହୋଇ ଯାଇଥିଲା । ସ୍କୁଲ ପକ୍ଷରୁ ପିଲାର ହାତ ସଫା କରି ବାନ୍ଧି କରି ସେମାନେ ଦେଇଥିଲେ । କିନ୍ତୁ ପିଲାର ମାଆଙ୍କ କହିବ ଅନୁଯାୟୀ, ପିଲାକୁ ଗତ ପାଞ୍ଚ ପାଳି ଧରି ଅଣ୍ଡା ନଦେଇ ରଖିଛନ୍ତି । ଯଦି ପିଲାଟି ପାଠ ଧରି ପାରୁନାହିଁ ତେବେ ତାକୁ ଭଲରେ ପଢେଇଲେ ସେ କେତେବେଳେ ବି ପାଠ ଧରିବ । ଅନ୍ୟ ପିଲା ଖାଉଛନ୍ତି ତାଙ୍କ ପିଲା ବସିକି ଦେଖୁଛି ଆଉ କାନ୍ଦୁଛି ।
ହାତ ଚାପି ହୋଇ ଏତେ ରକ୍ତ ବୋହିଗଲାଣି ପଛେ ତାଙ୍କୁ ଖବର ଦେଲେନାହିଁ । ଆଜି ଯଦି ତାଙ୍କ ପିଲା ଚେତାଶୁନ୍ୟ ହୋଇ ଯାଇଥାନ୍ତା ତେବେ କଣ ହୋଇଥାନ୍ତା କହି କାନ୍ଦି ପକାଇଛନ୍ତି ମା’ । ଦିଦି ମନଇଚ୍ଛା ପାଠ ପଢାଇବା ସହ ପିଲାଙ୍କୁ ଠିକରେ ଅଣ୍ଡା ଦିଅନ୍ତି ନାହିଁ ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।