ଚଳିତ ବର୍ଷ ଆଇପିଏଲରେ ଚେନ୍ନାଇ ସୁପର କିଙ୍ଗସ୍ ଦଳରେ ସାମିଲ ହୋଇଥିଲେ ଓଡିଶାର ନମ୍ବର ୱାନ କ୍ରିକେଟର ଶୁଭ୍ରାଂଶୁ ସେନାପତି । ଦୁଇମାସ ଧରି ଚେନ୍ନାଇ ଶିବିରରେ ରହିବା ପରେ ନିଜ ସାଥିରେ ଅନେକ ସ୍ମୃତି ଓ ଅନୁଭୂତି ଶୁଭ୍ରାଂଶୁ ଏବେ ଓଡିଶା ଫେରିଛନ୍ତି । ଚେନ୍ନାଇ ସୁପରକିଙ୍ଗସ୍ ର ସହ ଖେଳାଳି ବିଶେଷ କରି ମହେନ୍ଦ୍ର ସିଂ ଧୋନୀଙ୍କ ସହ ସମୟ ବିତାଇବାକୁ ନେଇ ଶୁଭ୍ରାଂଶୁ ବେଶ ଖୁସି ଥିବା କହିଛନ୍ତି ।
ଖାସ କରି ନେଟରେ ମହେନ୍ଦ୍ର ସିଂ ଧୋନୀଙ୍କ ସହ ଏକାଠି ବ୍ୟାଟିଂ ଅଭ୍ଯାସ କରିବା ତାଙ୍କ ପାଇଁ ମ୍ୟାଜିକ ମୋମେଣ୍ଟ ଥିଲା ବୋଲି ସେ କହିଛନ୍ତି । ବ୍ୟାଟିଂ ଅଭ୍ଯାସ ସମୟରେ ତାଙ୍କ ବ୍ୟାଟିଂ ଶୈଳୀକୁ ନେଇ ଧୋନୀ ମତାମତ ଦେଇଥିଲେ । ଏକ ବିଜ୍ଞାପନ ଶୁଟିଙ୍ଗ ସମୟରେ ମଧ୍ୟ ଧୋନୀଙ୍କ ସହ ତାଙ୍କର ଦେଖା ହୋଇଥିଲା । ଏହି ସମୟରେ ଓଡିଶା ସମ୍ପର୍କରେ ଧୋନୀଙ୍କ ସହ କଥା ହୋଇଥିଲେ ଶୁଭ୍ରାଂଶୁ । ଧୋନୀ କ୍ଲବ ମ୍ଯାଚ ଖେଳିବା ପାଇଁ ଅନେକ ଥର ସମ୍ବଲପୁର, ବାଲେଶ୍ଵର ଓ ବାରିପଦା ଆଦି ଆସିଥିବା କଥା କହିଥିଲେ ।
ଏହାସହ ଶିବଶଙ୍କର ଦାସ ଓ ପ୍ରଭଞ୍ଜନ ମଲ୍ଲିକଙ୍କ ପରି ଖେଳାଳିଙ୍କୁ ମଧ୍ୟ ସେ ମନେପକାଇ ଥିଲେ । ସେହି ସମୟରେ ଓଡିଶା ଇଷ୍ଟ ଷ୍ଟ୍ରଙ୍ଗ ଟିମ୍ ଥିଲା ବୋଲି ଧୋନୀ କହିଥିଲେ । ଏହାସହ ଶୁଭ୍ରାଂଶୁ କହିଛନ୍ତି ଯେ, ଚେନ୍ନାଇ ଶିବିରରେ ରହିଥିବା ବେଳେ ଅଷ୍ଟ୍ରେଲିଆର ପୂର୍ବତନ ଖେଳାଳି ମାଇକ ହସି ତାଙ୍କର ସବୁଠୁ ଅଧିକ ନିକଟତର ଥିଲେ । ସେ ମଧ୍ୟ ବ୍ୟାଟିଂ ଷ୍ଟାଇଲ ଉପରେ ଅନେକ ଟିପ୍ସ ଦେଇଥିବା କହିଛନ୍ତି ।
ଏପରିକି ୱେଷ୍ଟଇଣ୍ଡିଜ କ୍ରିକେଟର ବ୍ରାଭୋ ଟିମ୍ ରେ ବେଶ ମଜାକିଆ ଥିଲେ ବୋଲି ସେ କହିଛନ୍ତି । ଆଇପିଏଲ-୨୦୨୦ ରେ ଚେନ୍ନାଇ ପ୍ଲେ-ଅଫ ରୁ ବାଦ ପଡିଥିବା ବେଳେ ଦଳରେ ଖେଳିବା ପାଇଁ ତାଙ୍କୁ ସୁଯୋଗ ମିଳି ନଥିଲା । ତଥାପି ଅଭ୍ଯାସ ବେଳେ ଓ ଡ୍ରେସିଂ ରୁମ୍ ରୁ ଅନେକ କିଛି ଶିକ୍ଷା କରିଛନ୍ତି ଶୁଭ୍ରାଂଶୁ । ଦଳରେ ଏକ ଫ୍ରେଣ୍ଡଲି ବାତାବରଣ ଥିଲା । ଯେଉଁଥି ପାଇଁ ପ୍ରଥମ କରି ଆଇପିଏଲରେ ବଡ ବଡ ଖେଳାଳିଙ୍କ ସହ ଖେଳିବାକୁ ଯାଇଥିବା ଶୁଭ୍ରାଂଶୁଙ୍କୁ ଏତେ କଷ୍ଟ ହୋଇ ନଥିଲା ଓ ସମସ୍ତଙ୍କ ସହ ଖୁବ ଭଲ ମିଶି ପାରିଥିଲେ ।
ତେବେ ମହେନ୍ଦ୍ର ସିଂ ଧୋନୀଙ୍କୁ ନିଜ ଆଇଡଲ ଭାବେ ମାନନ୍ତି ଶୁଭ୍ରାଂଶୁ । ଆଇପିଏଲରେ ଧୋନୀ, ଜାଡେଜା ସମସ୍ତଙ୍କ ଠାରୁ ସୁନ୍ଦର ଅନୁଭୂତି ନେଇ ସେ ଫେରିଥିବା କଥା ସେ କହିଛନ୍ତି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।