ବୋହୂ ସୁଶ୍ରୀ ସଙ୍ଗୀତା ଆତ୍ମହତ୍ୟା କରିବା ଦିନ କ୍ୟାମେରା ଆଗରେ କାନ୍ଦି କାନ୍ଦି ଶାଶୁ କହୁଥିଲେ, ଆମର କିଛି ଦୋଷ ନାହିଁ । ଆମେ କିଛି ଜାଣିନୁ । ସେ ଟିକେ ଟିକେ କଥାରେ ରୁଷିଯାଏ, ଆଉ ମଜାରେ ମଜାରେ ଘର ଭିତରେ ପଶି କବାଟ ଦେଇ ଆତ୍ମହତ୍ୟା କରିଛି । କିନ୍ତୁ ସତ ସାମ୍ନାକୁ ଆସିବା ପରେ ବୋହୂକୁ ହତ୍ୟା କରିବା ମାମଲାରେ ଶାଶୁ ସାବିତ୍ରୀ ନାୟକଙ୍କୁ ଚଲେଇ ଚଲେଇ କୋର୍ଟ ନେଇଛି ପୋଲିସ । ତାହା ପୁଣି ସର୍ବ ସାଧାରଣଙ୍କ ସାମ୍ନାରେ , ଆଉ କ୍ୟାମେରା ଦେଖି ମୁହଁକୁ ଓଢଣାରେ ଢାଙ୍କି ଦେଉଛନ୍ତି ଶାଶୁ ।
ରାଜଧାନୀ ଉପକଣ୍ଠ କଳିଙ୍ଗ ବିହାରରୁ ଦୀପାବଳି ଦିନ ଜଣେ ନବବଧୂଙ୍କ ଝୁଲନ୍ତା ମୃତଦେହ ଉଦ୍ଧାର କରିଥିଲା ପୋଲିସ । ଆଉ ଗତକାଲି ତାଙ୍କ ଶାଶୁ ସାବିତ୍ରୀଙ୍କୁ ଗିରଫ କରିଛି କମିଶନରେଟ ପୋଲିସ । ହେଲେ ଅନ୍ୟପଟେ ବୋହୂ ଜୀବନ ହାରିବା ପରେ ଶ୍ଵଶୁର ଓ ସ୍ଵାମୀ ପ୍ରବୀଣ ଫେରାର ଅଛନ୍ତି । ତେଣୁ ସର୍ବ ସାଧାରଣରେ ପ୍ରଶ୍ନ ଉଠୁଛି ଯଦି ବୋହୂ ସୁଶ୍ରୀ ସଙ୍ଗୀତାଙ୍କ ମୃତ୍ୟୁରେ ପରିବାରର କୌଣସି ସମ୍ପୃକ୍ତି ନାହିଁ ତେବେ ପୋଲିସ ଭୟରେ ସେମାନେ କାହିଁକି ଫେରାର ହେଲେ ?
ସଙ୍ଗୀତାଙ୍କ ବାପଘର ଲୋକ କିନ୍ତୁ ଝିଅର ମୃତ୍ୟୁ ପାଇଁ ରୋକଠୋକ ଶାଶୁଘର ଲୋକଙ୍କୁ ଦାୟୀ କରିଛନ୍ତି । ଇଏ ହେଉଛନ୍ତି ନିଆଳି ଅଞ୍ଚଳର ଝିଅ ୨୮ ବର୍ଷିୟା ସୁଶ୍ରୀ ସଙ୍ଗୀତା ବସ୍ତିଆ । ସେ ୨୦ ଜାନୁୟାରୀ ୨୦୨୧ରେ କଟକ ଗୋବିନ୍ଦପୁର ଥାନା ନୂଆଗାଁର ପ୍ରବୀଣଚନ୍ଦ୍ର ନାୟକଙ୍କୁ ବିବାହ କରିଥିଲେ । ଦୀପାବଳି ଦିନ କୌଣସି କାରଣରୁ ତାଙ୍କ ଶାଶୁଘରେ ପାରିବାରିକ ବିବାଦ ଉପୁଜିଥିଲା ।
ଏହାପରେ ସୁଶ୍ରୀ ସଙ୍ଗୀତାଙ୍କ ବାପଘରକୁ ପ୍ରବୀଣଙ୍କ ଘରଲୋକ କଲ୍ କରିଥିଲେ । ସୁଶ୍ରୀଙ୍କ ଭାଇ ଫୋନ୍ ଉଠାଇବା ପରେ ତାଙ୍କୁ କୁହା ଯାଇଥିଲା କି, ତୁମ ଭଉଣୀର ଦେହ ଭଲ ନାହିଁ, ସେ ଘର କବାଟ ବନ୍ଦ କରିଥିଲା । ତା’ର ସେନ୍ସ ଆସୁନି ଆମେ ତାକୁ ମେଡିକାଲ ନେଉଛୁ ତୁମେ ଶୀଘ୍ର ଆସ । ବାପଘର ଲୋକେ ଆସି ପହଞ୍ଚିବା ବେଳକୁ ଝିଅର ମୃତ୍ୟୁ ହୋଇ ଯାଇଥିବା ଏବଂ ମୃତଦେହ AIIMS ହସ୍ପିଟାଲରେ ଥିବା ଶାଶୁଘର ଲୋକେ ଜଣାଇଥିଲେ ।
ଝିଅକୁ ମାରି ସବୁ ପ୍ରମାଣ ନଷ୍ଟ କରିଥିବା ଅଭିଯୋଗ କରିଥିଲେ ସଙ୍ଗୀତାଙ୍କ ପରିବାର ଲୋକେ । ସ୍ଵାମୀ ଓ ଶ୍ଵଶୁର ଫେରାର ଥିବାବେଳେ ସଙ୍ଗୀତାଙ୍କ ପରିବାର ଏକ ମାମଲା ରୁଜୁ କରିବା ପରେ ପୋଲିସ ଶାଶୁ ସାବିତ୍ରୀ ନାୟକଙ୍କୁ ଗିରଫ କରିଛି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।