ଦୋକାନ ଭିତରେ ଏକଦମ ସାମ୍ନାରେ ସିସିଟିଭି ଲାଗିଛି, ହେଲେ ଚୋର କିଛି ଖାତିର ନକରି ଚୋରୀ କରିବାରେ ଲାଗି ପଡିଛି । ରାସ୍ତାରେ ଲୋକଙ୍କୁ ଦେଖି ରହି ଯାଉଛି ଆଉ ଲୋକ ଯିବା ପରେ ଦୋକାନ ଡ୍ର’ ଭିତରେ ହାତ ପୁରେଇ ଟଙ୍କା ଖୋଜିବାରେ ଲାଗିଛି । ବ୍ରହ୍ମପୁର ବଡବଜାର ଥାନା ଅନ୍ତର୍ଗତ ପ୍ରେମନଗର ଦ୍ଵିତୀୟ ଲେନ୍ ଜଗନ୍ନାଥ ମନ୍ଦିର ସମୁଖରେ ଥିବା ଏକ ଦୋକାନରେ ଏଭଳି ଏକ ଦୃଶ୍ୟ ଦେଖିବାକୁ ମିଳିଛି ।
ସେଠାରେ ଥିବା ଏହି ଭେରାଇଟି ଷ୍ଟୋରର ମାଲିକ କୌଣସି କାମରେ ଗାନ୍ଧୀନଗର ଯାଇଥିବା ବେଳେ ଦୋକାନରେ କାମ କରୁଥିବା ପିଲା ଦାୟିତ୍ବରେ ଦୋକାନ ଭାର ଦେଇ ଯାଇଥିଲେ । ହେଲେ ଏହା ମଧ୍ୟରେ ଦୋକାନ ପିଲା ଦୋକାନ ଖୋଲା ଛାଡି କୌଣସି କାମରେ ବାହାରକୁ ଯାଇଥିଲା । ସେହି ସମୟରେ ଦୁଇଜଣ ଯୁବକ ଏକ ସାଇକେଲରେ ଆସି ଦୋକାନ ଭିତରକୁ ପଶିଥିଲେ ।
ଜଣେ ଯୁବକ ବାହାରେ ଠିଆ ହୋଇ ଜଗିଥିବା ବେଳେ ଅନ୍ୟ ଜଣେ ଯୁବକ ଦୋକାନ ଡ୍ର’ରେ ହାତ ମାରି ଟଙ୍କା ଖୋଜିବାରେ ଲାଗି ପଡିଥିଲା । ହେଲେ ସେମାନେ ଯେଉଁ ଡ୍ର’ ରେ ହାତ ମାରୁଥିଲେ ସେଥିରେ କେବଳ ଏକ ପର୍ସ ଓ ଅନ୍ୟ କିଛି ସାମଗ୍ରୀ ଥିଲା । ପର୍ସଟିକୁ ଚୋର କାଢି ନେଇ ଦେଖିଥିଲା ହେଲେ ସେଥିରେ କିଛି ଟଙ୍କା ନଥିଲା । ସେପଟେ ତା’ ସାଥି ଚୋର ଜଣକ ରାସ୍ତାରେ ଯାଉଥିବା ଲୋକଙ୍କ ଉପରେ ନଜର ରଖିଥିଲା ।
ବାହାରେ ଥିବା ଯୁବକର ନିର୍ଦ୍ଦେଶରେ ଅନ୍ୟ ଯୁବକଟି ଦୋକାନରୁ ଚୋରି କରିବାକୁ ଚେଷ୍ଟା କରୁଥିଲା । ହେଲେ ଦୋକାନରେ ଥିବା ଚାରୋଟି ଡ୍ର’ ଭିତରୁ ପଇସା ନଥିବା ଡ୍ର’ ଟି କେବଳ ଖୋଲା ଥିଲା । ପଇସା ଥିବା ଅନ୍ୟ ଡ୍ର’ ରେ ପଡିଥିଲା, ସେଥିପାଇଁ ଚୋର ଡ୍ର’ କୁ ଖୋଲି ପାରି ନଥିଲା । ଆଉ ଚୋର ମାନଙ୍କର ଏଭଳି ଚୋରି କରିବାକୁ ଚେଷ୍ଟା କରିବାର ଭିଡିଓ ସିସିଟିଭି କ୍ୟାମେରାରେ ବେଶ ସ୍ପଷ୍ଟ ଭାବେ କଏଦ ହୋଇଛି ।
ତେବେ ପରବର୍ତ୍ତୀ ସମୟରେ ଟଙ୍କା ପଇସା କିଛି ନପାଇ ଚୋର ଦୁଇଜଣ ନିରାଶ ହୋଇ ସେଠାରୁ ଚାଲି ଯାଇଥିଲେ । ତେବେ ଏନେଇ ଦୋକାନ ମାଲିକ ଥାନାରେ କୌଣସି ଏତଲା ଦେଇ ନଥିବା ବେଳେ ଦୁଇ ଯୁବକ ଚୋରି କରିବାକୁ ଚେଷ୍ଟା କରିବା ବେଳର ଏହି ଭିଡିଓଟି ବର୍ତ୍ତମାନ ସୋସିଆଲ ମିଡିଆରେ ଖୁବ ଜୋରରେ ଭାଇରାଲ ହେଉଛି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।