ଆଜି ଆମେ ଆପଣଙ୍କୁ ଏଭଳି ଜଣେ ବ୍ୟକ୍ତିତ୍ବଙ୍କ ସହ ପରିଚିତ କରାଇବୁ ଯିଏ ଆଜିର ଯୁବପିଢିଙ୍କ ପାଇଁ ଜଣେ ପ୍ରେରଣା । ସେ MBBS ପାଠ ପଢିବା ପରେ ଓ ସେଥିରେ ଭଲ କ୍ଯାରିୟର ବନାଇବା ପରେ ମଧ୍ୟ IPS ହେବାକୁ ମନ ବଳାଇଥିଲେ । ଆଉ ସେ ଆଜି ଓଡିଶାର ବ୍ରହ୍ମପୁରରେ SP ଭାବେ କାର୍ଯ୍ୟରତ ଅଛନ୍ତି । ଆମେ କହୁଛୁ ବ୍ରହ୍ମପୁର SP ଡକ୍ଟର ଶ୍ରବଣ ବିବେକ ଏମ କୁମାର ଙ୍କ କଥା । ତାଙ୍କ ସେବା ମନୋଭାବ ଏବଂ ନିଜ କାର୍ଯ୍ୟ ପ୍ରତି ଆଗ୍ରହ ତାଙ୍କୁ ସମସ୍ତଙ୍କ ଠାରୁ ଭିନ୍ନ ବନେଇଥାଏ ।
ଶ୍ରବଣ ବିବେକଙ୍କ ଜନ୍ମ କନ୍ୟାକୁମାରୀରେ ଓ ସେହିଠାରେ ସେ ଛୋଟବେଳୁ ରହିଥିଲେ । ତାଙ୍କ ବାପା ଜଣେ ଡାକ୍ତର ଥିବାବେଳେ ବେଶ ନିରାଡମ୍ବର ଜୀବନଶୈଳୀ ଥିଲା । ମା ମଧ୍ୟ କନ୍ୟାକୁମାରୀରେ ଏକ ସରକାରୀ ବିଦ୍ୟାଳୟରେ ପାଠ ପଢାଉଥିଲେ । ପରିବାର ବେଶ ସମ୍ଭ୍ରାନ୍ତ ଥିଲା ଓ ତାଙ୍କର ବଡ ବଙ୍ଗଳା ସାଙ୍ଗକୁ ଚାରୋଟି ଗାର୍ଡେନ ମଧ୍ୟ ଥିଲା ବୋଲି ସେ କୁହନ୍ତି । ହେଲେ ସେ ବହୁ କମ୍ ବୟସର ହୋଇଥିବା ବେଳେ ତାଙ୍କ ବାପା ଲିଭର ରୋଗରେ ପୀଡିତ ହୋଇ ଆଖି ବୁଜି ଦେଇଥିଲେ ।
ଏହା ପରଠାରୁ ତାଙ୍କ ପରିବାରକୁ ଆର୍ଥିକ ସମସ୍ଯା ଦେଇ ଗତି କରିବାକୁ ପଡିଥିଲା । ତାଙ୍କ ମା’ ଯେହେତୁ ଜଣେ ଶିକ୍ଷୟତ୍ରୀ ଥିଲେ ତେଣୁ ସେ ନିଜେ ସଂଘର୍ଷ କରି ପିଲାମାନଙ୍କୁ ଉଚ୍ଚ ଶିକ୍ଷା ଦେଇଥିଲେ । ଶ୍ରବଣଙ୍କ ବାପା ଯେହେତୁ ଡାକ୍ତର ଥିଲେ ସେଥିପାଇଁ ସମ୍ପର୍କୀୟମାନେ ତାଙ୍କୁ ସବୁବେଳେ ବାପା ଭଳି ଡାକ୍ତର ହେବୁ ବୋଲି କହୁଥିଲେ । ସେ ମଧ୍ୟ ଭାବି ନେଇଥିଲେ କି ଡାକ୍ତର ହେବେ ।
2003 ରେ ପଣ୍ଡିଚେରିରେ ମହାତ୍ମାଗାନ୍ଧୀ ମେଡିକାଲ କଲେଜରେ ସେ ଯୋଗ ଦେଇଥିଲେ ଓ 2009 ରେ ଡାକ୍ତରୀ ପାସ କରିବା ପରେ ସେ ଡାକ୍ତର ଭାବେ ଅନେକ ସ୍ଥାନରେ କାମ କରିଥିଲେ । ଏପରିକି ଚେନ୍ନାଇର ଆପୋଲୋ ହସ୍ପିଟାଲରେ ମଧ୍ୟ ସର୍ଜନ ଭାବେ କାମ କରିଥିଲେ । ତେବେ ହସ୍ପିଟାଲରେ ଥିବାବେଳେ ସେ ଅନେକ ଡାକ୍ତର ଓ ପ୍ରଫେଶରଙ୍କ ସଂସ୍ପର୍ଶରେ ଆସିଥିଲେ ଯେଉଁମାନେ ଡାକ୍ତରୀ ପଢିବା ପରେ IAS ଏବଂ IPS ହୋଇଛନ୍ତି ।
ତାଙ୍କ ଉପରେ ସେଭଳି କିଛି ପ୍ରଭାବ ପଡିବା ପରେ ସେ IPS ପରୀକ୍ଷା ଦେବାକୁ ଇଚ୍ଛା ପ୍ରକାଶ କରିଥିଲେ ଓ ଏଥିରେ ସଫଳ ମଧ୍ୟ ହୋଇଥିଲେ । ଶ୍ରବଣଙ୍କୁ ଓଡିଶା କ୍ୟାଡରରେ SDPO ଭାବେ ପ୍ରଥମେ ମାଲକାନଗିରିରେ ପୋଷ୍ଟିଂ ମିଳିଥିଲା । ଏହାପରେ ରାୟଗଡା ଜିଲ୍ଲାରେ ପ୍ରଥମେ SP ଭାବେ ପୋଷ୍ଟିଂ ମିଳିଥିଲା ଓ ଏହାପରେ କଳାହାଣ୍ଡିକୁ ଟ୍ରାନ୍ସଫର ହୋଇଥିଲା ।
ସେଠାରେ ନ-କ୍ସ-ଲ ଦମନ କରିବାରେ ବହୁ ସଫଳତା ପାଇବା ପରେ ଏବେ ତାଙ୍କୁ ବ୍ରହ୍ମପୁରକୁ ଟ୍ରାନ୍ସଫର କରାଯାଇଛି । ତାଙ୍କ ବ୍ୟକ୍ତିତ୍ବ ଓ କାର୍ଯ୍ୟ ସମସ୍ତଙ୍କୁ ବେଶ ପ୍ରେରଣା କରୁଛି । ଆମ ପୋଷ୍ଟ ଅନ୍ୟମାନଙ୍କ ସହ ଶେୟାର କରନ୍ତୁ ଓ ଆଗକୁ ଆମ ସହ ରହିବା ପାଇଁ ଆମ ପେଜ୍ କୁ ଲାଇକ କରନ୍ତୁ ।